Qyzylorda oblysynda bıyl Rýhanııat jyly atap ótilmek
QYZYLORDA. KAZINFORM – Syr óńiriniń mádenıet jáne óner salasyndaǵy jaǵymdy jańalyqtar bıyl da jalǵasady. Bul týraly oblys ákimi Nurlybek Nálibaev oblystyq máslıhat sessııasynda aıtty.
Ótken aptadaǵy keńeıtilgen májiliste Memleket basshysynyń «Adal adam» kontseptsııasy aıasynda barlyq eldi mekendegi klýbtar men mádenıet úılerinde «Adal adam» rýhanı-mádenı ortalyqtary ashylatyny aıtyldy. Bul ortalyqtarda otanshyldyq, naǵyz maman bolý, eńbekqorlyq sııaqty asyl qasıetter dáripteledi.
«Byltyr Qyzylorda qalasynda «Anaǵa taǵzym» ortalyǵy, «Otbasy ortalyǵy» óz qyzmetin bastady. «Shirik-Rabat Saq jaýyngeri» men «Syǵanaq hanshaıymynyń» músinderi oblystyq mýzeıge tapsyryldy. Halqymyzdyń jyl basy jáne jańarý aıy – Naýryzdan bastap Syr óńirinde bıylǵy jyldy «Rýhanııat jyly» dep jarııalaımyz», – dedi Nurlybek Mashbekuly.
Byltyr óner jáne ádebıet ókilderine «Turan» arnaıy syılyǵy tabystaldy. Jeltoqsan aıynda elordada Qyzylorda oblysynyń mádenıet jáne óner kúnderi joǵary deńgeıde ótkizildi.
Aldaǵy sáýir aıynda óner kúnderi Almaty qalasynda uıymdastyrylmaq.
Jaqynda 1000 oryndyq «Óner ortalyǵy» qyzmetin bastaıdy. Barlyq aýdanda neke qııý zaly, kitaphana, mýzeı, arhıv, jastar, ardagerler men analar úıi ornalasatyn «Rýhanııat» ortalyqtary salynady.
