Qyzylorda oblysynda bıyl qyzylsha juqtyrýdyń 30 deregi anyqtaldy

Qyzylorda oblysynda jyl basynan beri qyzylsha juqtyrýdyń 30 deregi anyqtaldy. Byltyr olardyń sany 1682 adamdy quraǵan edi, dep habarlaıdy Kazinform. 

Qyzylorda oblysynda qyzylsha aýrýynyń epıdemıologııalyq ahýaly turaqtanyp keledi. 2023 jyldyń qarasha aıynda aýrýǵa shaldyǵýdyń 501 deregi tirkelgen bolsa, jeltoqsan aıynda 474 jaǵdaı anyqtaldy.

Tómendeý tendentsııasy baıqalýynan qyzylshaǵa qarsy qosymsha jappaı ımmýndaý naýqanynyń tıimdiligin kórýge bolady. Ótken jyldyń 6 qarashasynan bastalǵan atalǵan shara barysynda 60 myńǵa jýyq adam aýrýǵa qarsy ekpe aldy. Nátıjesinde turǵyndar arasynda ujymdyq ımmýnıtet qalyptasyp otyr.

«Epıdemıologııalyq ahýaldy turaqtandyryp, vırýs aınalymyn álsiretý úshin áli de tıisti kontıngent ekpemen qamtylyp, qorǵanysh qabiletin nyǵaıtý kerek. Qazir aımaqtaǵy barlyq emhanada qyzylshaǵa qarsy qosymsha ımmýndaý jalǵasýda. Biz ata-analardy 6-11 aılyq sábılerin, 2-5 jas aralyǵyndaǵy balalaryn aýrýǵa qarsy egýge shaqyramyz. Odan bólek, Ulttyq egý kúntizbesine sáıkes árbir bala 12-15 aılyǵynda jáne 6 jasynda qyzylsha, qyzamyq pen parotıtke qarsy vaktsına alýy qajet», - dep málim etti Qyzylorda oblysynyń sanıtarııalyq-epıdemıologııalyq baqylaý departamentinen.

Vedomstvo málimetinshe, byltyr barlyǵy 1682 qyzylsha juqtyrý deregi anyqtaldy. Al jańa 2024 jyly 30 derek anyqtaldy. Epıdemıologııalyq monıtorıng qyzylsha indetine shaldyqqandardyń basym bóligi aýrýǵa qarsy ekpe almaǵandyǵyn kórsetip otyr.