Qyzylorda oblysynda bıyl 81 myńnan astam jedel respıratorly vırýsty ınfektsııaǵa shaldyqqan

QYZYLORDA. KAZINFORM - Qyzylorda oblysynda bıyl 81 myńnan astam jedel respıratorly vırýsty ınfektsııaǵa shaldyqqan. Onyń ishinde 14 jasqa deıingi balalar úlesi basym.

Mamandar jazdyń aıaqtalyp, kúzdiń salqyny bastalǵan ýaqytta jedel respıratorly vırýsty ınfektsııalardyń, tumaýdyń beleń alatynyn aıtady. Bul ýaqytta oǵan shaldyqqandar sany kóbeıedi.

«Bıyl jyl basynan beri oblysta jedel respıratorly vırýsty ınfektsııaǵa 81258 adam syrqattanǵan. Onyń ishinde 14 jasqa deıingi balalar úlesi – 51 801. Al tumaý aýrýy 78 adamnan anyqtaldy. Dúnıejúzilik densaýlyq saqtaý uıymy halyqty tumaýdan qorǵaýdyń jalǵyz jáne tıimdi ádisi retinde tumaýǵa qarsy vaktsınatsııalaýdy usynady. Osy maqsatta tumaýdyń epıdahýalyn turaqtandyrý jáne aýrý deńgeıin tómendetý baǵytynda 85004 doza vaktsına qoımaǵa jetkizildi. Tumaýǵa qarsy ımmýndaýǵa Reseı elinde óndirilgen «Grıppol plıýs» vaktsınasy qoldanylady», - deıdi Qyzylorda oblysynyń Sanıtarııalyq-epıdemıologııalyq baqylaý departamentiniń basshysy Dınara Jańabergenova.

​Tumaý óziniń asqynýymen qaýipti. Eń jıi kezdesetin tumaý aýrýynyń asqynýy – pnevmonııa. Basqa da jıi kezdesetin asqynýlar - bronhıt, sınýsıt, otıt, mıozıt, mıokardıt. Bul aýrý 2 jasqa deıingi balalar, sozylmaly aýrýy bar naýqastar jáne qarttar arasynda aýyr aǵymda ótedi.

Eske salsaq, budan buryn Qyzylordada balasyna vaktsına salǵyzbaıtyn ata-analar kóbeıip keledi.