Qyzylorda oblysynda bıyl 37 adam koronavırýs ınfektsııasyn juqtyrdy

QYZYLORDA. KAZINFORM - Qyzylorda oblysynda jyl basynan beri 37 adam koronavırýs ınfektsııasyn juqtyrdy.

Byltyr óńirde koronavırýs ınfektsııasyn juqtyrýdyń 118 deregi anyqtaldy. Onyń ishinde 14 jasqa deıingi balalar úlesi 47 derekti qurady.

Bıyl jyl basynan beri koronavırýs ınfektsııasynyń 37 jaǵdaıy tirkeldi. Onyń 27-si qańtar aıynda anyqtalǵan. Al aqpan aıynda ol 10 jaǵdaıdy qurady. Basym kópshiligi aýrý sımptomymen anyqtaldy. 

«Elimizde birqatar óńirde KVI boıynsha aýrýshańdyq kórsetkishteriniń artýy baıqalady. Jalpy, kúz, qys, kóktem mezgilderi tumaý, jiti respıratorly vırýsty ınfektsııalardyń epıdemıologııalyq maýsymy sanalady. Osyǵan oraı QR halqynyń arasynda aýa-tamshy joly arqyly beriletin ınfektsııalyq aýrýlardyń (qyzylsha, COVID-19 koronavırýs ınfektsııasy, tumaý jáne basqa da jiti respıratorlyq vırýstyq ınfektsııalar) taralýynyń aldyn alý maqsatynda QR Bas memlekettik sanıtarııalyq dárigeriniń 2024 jylǵy 8 aqpandaǵy №2 qaýlysy qabyldandy», - dep málim etti Qyzylorda oblystyq sanıtarııalyq-epıdemıologııalyq baqylaý departamentinen. 

Eske salsaq, budan buryn Qyzylorda oblysynda 67 myńǵa jýyq adam qyzylsha aýrýyna qarsy ekpe aldy.