Qyzylorda oblysynda bıyl 34 myńnan astam adam JRVI-men aýyrdy

QYZYLORDA. KAZINFORM - Qyzylorda oblysynda bıyl epıdemıologııalyq maýsymda jiti respıratorly vırýsty ınfektsııa 34138 adamnan anyqtaldy.

Bul ótken jyldyń osy kezeńimen salystyrǵanda aýrýshańdyq kórsetkishiniń 5%-ǵa tómendegenin kórsetedi. Naýqastarǵa zerthanalyq taldaýlar júrgizý barysynda 84 tumaý emes vırýstar anyqtaldy. Olardyń basym kópshiligin RS vırýsy (47 derek) qurasa, qalǵany adenovırýs, paragrıpp, rınovırýs, bokovırýs quraıdy. 

- Dúnıejúzilik densaýlyq saqtaý uıymy halyqty tumaýdan qorǵaýdyń jalǵyz jáne tıimdi ádisi retinde tumaýǵa qarsy vaktsınatsııalaýdy usynady. Bıyl tumaýǵa qarsy vaktsınatsııalaý 15 qyrkúıekten bastaldy. Bul maqsatta oblystyq bıýdjetten 85 004 doza vaktsına satyp alyndy. Reseı elinde óndirilgen «Grıppol plıýs» vaktsınasy tumaýdyń shtamdaryna qarsy tıimdi qorǵanys qalyptastyrady. Vaktsınatsııalaý oblys emhanalarynda jalǵasýda. Tıisti talaptarǵa sáıkes jyl saıyn tumaýǵa qarsy vaktsınatsııalaý tıisti kontıngentterge turǵylyqty meken-jaıy boıynsha emhanalarda tegin júrgiziledi. Olardyń qatarynda medıtsına qyzmetkerleri, medıtsınalyq uıymda dıspanserlik esepte turǵan jetkinshekter, sábıler úıleriniń balalary, qarttar úıiniń kontıngenti bar. Sondaı-aq eńbek ujymdary óz qyzmetkerlerin tumaýǵa qarsy aqyly túrde egýge múmkindikter qarastyrylǵan, - dedi Qyzylorda oblysynyń sanıtarııalyq-epıdemıologııalyq baqylaý departamentiniń bólim basshysy Álııa Ydyrysova.

Eske salsaq, 9 aı ishinde Qazaqstanda 76 myńnan astam pnevmonııaǵa shaldyqqan jaǵdaı tirkelgen.