Qyzylorda oblysynda balabaqsha esepshisi 21,5 mln teńge jymqyrdy degen kúdikke ilindi
ASTANA. KAZINFORM - Qyzylorda oblysynyń Qazaly aýdanynda balabaqsha esepshisi ózine joǵary jalaqyny zańsyz tóleý arqyly 21,5 mıllıon teńgeden astam bıýdjet qarajatyn jymqyrdy degen kúdikke ilindi, dep habarlaıdy Qyzylorda oblystyq prokýratýrasynyń baspasóz qyzmeti.
Júrgizgen taldaý nátıjesinde balabaqsha esepshisiniń 4 jyl ishinde shtattyq keste boıynsha bekitilgen jalaqydan joǵary mólsherde óziniń banktik shottaryna qosymsha qarajatty negizsiz aýdarǵany anyqtaldy.
Atalǵan fakti boıynsha aýdan prokýratýrasy Qylmystyq kodekstiń 189-baby 4-bóliginiń 2) tarmaǵymen kózdelgen, ıaǵnı asa iri mólsherde senip tapsyrylǵan bóten múlikti ıemdený faktisi boıynsha sotqa deıingi tergep-tekserýdi bastady.
Qylmystyq is tergep-tekserý úshin Qyzylorda oblysy boıynsha ekonomıkalyq tergep-tekserý departamentine joldanady.
Qazirgi ýaqytta sotqa deıingi tergep-tekserý júrgizilýde.
Osyǵan deıin Aqtóbede mádenıet úıiniń eks-esepshisi men mamanyna 29 mln teńge jymqyrdy degen aıyp taǵylǵany týraly jazdyq.
