Qyzylorda oblysynda balabaqsha ashanasynda tyshqan júrgeni jóninde beınejazba tarady

QYZYLORDA. KAZINFORM — Qyzylorda oblysy Qarmaqshy aýdanyna qarasty balabaqsha ashanasynda tyshqan júrgeni jóninde beınejazba tarady.

Áleýmettik jelide jarııalanǵan beınejazbaǵa baılanysty Qarmaqshy aýdandyq bilim bólimi jaýap berdi. 

— Atalǵan máseleler tolyq zerdelenip jatyr. Zańdylyqqa sáıkes tıisti sheshim shyǵarylatyn bolady, — dep málim etti basqarmadan.

Al Qarmaqshy aýdandyq sanıtarııalyq-epıdemıologııalyq baqylaý basqarmasynyń habarlaýynsha, QR Kásipkerlik Kodeksiniń 2015 jylǵy 29 qazandaǵy № 375-V 144 baby 7 bóligine sáıkes, naqty baqylaý men qadaǵalaý sýbektilerine (obektilerine) qatysty anyqtalǵan jáne osy jospardan tys tekserýdi taǵaıyndaýǵa negiz bolǵan faktiler men mán-jaılar jospardan tys tekserýge jatady.

— Kodekstiń 144 baby 5 bóligi 3 tarmaqshasynda, senimdi negizder jáne rastaıtyn dáleldemeler bolǵan kezde QR zańnamasynyń talaptaryn buzýshylyqtar boıynsha jeke jáne zańdy tulǵalardyń joldanymdary baqylaý men qadaǵalaý sýbektilerin (obektilerin) jospardan tys tekserýge negiz bolyp tabylady. Joǵarydaǵylar negizinde, basqarmaǵa senimdi negizder jáne rastaıtyn dáleldememen qosa aryz túsken jaǵdaıda jospardan tys tekserý júrgizýge múmkindik bolatyndyǵyn habarlaıdy, — dep jaýap berdi basqarmadan.

Eske salsaq, budan buryn Qyzylorda oblysynda bir aýyl alkogol ónimin satýdan bas tartty.