Qyzylorda oblysynda aýylǵa barǵan 10 dáriger 8,5 mln teńgeden aldy

QYZYLORDA. KAZINFORM – Qyzylorda oblysynda 3 myńǵa jýyq dáriger jáne 11 myńǵa jýyq orta býyndy maman qyzmet etedi.

Oblystyq densaýlyq saqtaý basqarmasy kadr tapshylyǵy jergilikti bıýdjet qarajaty esebinen birtindep sheshilip kele jatqanyn alǵa tartty. 2020 jyly suranysqa ıe medıtsına qyzmetkerlerine birmezettik áleýmettik kóterme aqy berile bastady. 2020-2023 jyldar aralyǵynda 99 jas maman 500 aılyq eseptik kórsetkish mólsherinde birmezettik kóterme aqy aldy. Ótken jyly keminde 5 jyl merzimge aýylǵa jumys isteýge barǵan 4 medıtsına qyzmetkerine 8,5 mln teńge kóleminde birjolǵy aqshalaı tólem engizildi. 

- Qyzylorda oblysynda 93 dáriger jetispeıdi. Tapshylyq negizinen aýyldyq jerlerde baıqalady. Onyń ishinde neonatolog, hırýrg, travmatologqa suranys joǵary. Biz bir mezette 10 dárigerdi qolyna 8,5 mln teńge berip, aýyldarǵa jiberdik. Bul - eń tómengi jalaqynyń 100 eselengen mólsheri. Onyń 7-i anestezıolog-reanımatolog bolsa, 1-i - travmatolog ortoped, 2-i - kardıolog. Medıtsınaǵa endi bet burǵan áriptesterimiz úshin bul - úlken qoldaý, - dedi basqarma basshysy Oljas Ysqaqov. 

2023 jyldan bastap óńirge asa qajet medıtsına mamandyqtarynda oqıtyn 60 rezıdentke oblys ákiminiń granty taǵaıyndaldy. Al jalpy medıtsına mamandyǵy boıynsha mamandar daıarlaýǵa taǵy 45 bilim granty bólindi. Olardy kezegimen jumysqa ornalastyrý múmkindigi de qarastyrylǵan.

- Bul is-sharalar 2-3 jyl kóleminde aımaqty dárigerlermen tolyq qamtamasyz etýge, tar býyndy mamandar tapshylyǵyn meılinshe azaıtýǵa múmkindik beredi dep esepteımin, - dedi basqarma basshysy. 

Eske salsaq, «Aýyldyq densaýlyq saqtaýdy jańǵyrtý» ulttyq jobasy sheńberinde Qyzylorda oblysynda 8 jańa dárigerlik ambýlatorııa salyndy.