Qyzylorda oblysynda aýyl turǵyndary 13 bıznes-bastamany iske asyryp otyr
QYZYLORDA. KAZINFORM — Qyzylorda oblysynyń Besaryq aýylynda 2016 jyldan bastap jumys istep kele jatqan seriktestiktiń óndiristik alańynda 318,2 mln teńgege aýyl turǵyndarynyń 13 bıznes-bastamasy iske asyryp otyr. Bul týraly QR Úkimetiniń baspasóz qyzmeti málim etti.
Munda jartylaı fabrıkattar, plastıkalyq ydystar, aǵashtan jasalǵan buıymdar, toqyma, kondıterlik ónimder, sabyn jáne basqa da ónimder óndiretin tsehtar ashylǵan. Birneshe sharýashylyq túrimen aınalysatyn mekeme aldaǵy ýaqytta óndiristi keńeıtýdi josparlap otyr.
«Eń basynda kúrish daqylyn ósirip, óńdeýdi maqsat etken bolatynbyz. Keıin sharýashylyqty ártaraptandyrý úshin qus, mal sharýashylyqtarymen de aınalysa bastadyq. Odan bólek, 7 ga jerge júzim, 3 ga aýmaqqa alma baǵyn otyrǵyzdyq. Kókónis egýdi de qolǵa alýdamyz. “Aýyl amanaty” baǵdarlamasy arqyly jergilikti turǵyndarǵa qajetti nysandar salyp berdik. Sonymen birge plastık ydys shyǵarý, toqyma jáne kondıterlik ónimder shyǵaratyn tsehtar ashyp berip jatyrmyz», — deıdi «Abaı-Dáýlet» JShS dırektory Murat Sársenbaev.
Qyzylorda oblysynda qoımalardyń qýaty azyq-túlik baǵasyn turaqtandyrýdy qamtamasyz etedi.
Al, Qyzylorda oblysyndaǵy «Jan Araı» agrarlyq-ındýstrııalyq kesheni kúrish ósirýmen jáne óńdeýmen, qurama jem óndirýmen, jemister men kókónisterdi óńdep, saqtaýmen aınalysady. Maýsymaralyq kezeńde ÁMAT baǵasyn turaqtandyrýdy qamtamasyz etý úshin kásiporyn zamanaýı qoımalar men muzdatqysh kameralardyń qýatyn keńeıtedi.
«Bizdegi jemister men kókónisterdi saqtaýǵa arnalǵan zamanaýı muzdatqysh kameralardyń syıymdylyǵy 4 myń tonnaǵa jetedi. Saqtaý ornyna kirgizbes buryn ónimderdi suryptaımyz, bizdiń suryptaý zaldarynyń syıymdylyǵy shamamen 5 myń tonna ónimdi quraıdy. Jobanyń jalpy quny – 1 mlrd teńgeden astam, ony iske asyrýǵa biz óz qarajatymyzdy saldyq, sondaı-aq Agrarlyq nesıe korporatsııasynyń da qarjsysyn aldyq. Sonymen qatar eki mýltımedııalyq muzdatqysh jáne 10 mln tonnalyq azyq-túlik saqtaý zaly bar. Bizdegi qor óńirdegi azyq-túlik baǵasyn turaqtandyrý úshin paıdalanylady, biz olardy únemi tolyqtyryp otyramyz», — dep atap ótti «Jan Araı» JShS quryltaıshysy Baqdáýlet Mahashov.
Eske sala keteıik, Úkimet basshysy Oljas Bektenov jumys saparmen Qyzylorda oblysyna bardy. Memleket basshysynyń tapsyrmasy boıynsha Premer-mınıstr Oljas Bektenov Qyzylorda qalasyndaǵy «Qorqyt Ata» áýejaıynda jańa termınaldyń ashylýyna qatysty.
