Qyzylorda oblysynda aýyl sharýashylyǵy ónimderiniń jármeńkesi turaqty uıymdastyrylady
QYZYLORDA. KAZINFORM - Qyzylorda oblysynda azyq-túlik taýarlary baǵasyn turaqtandyrý baǵytynda nátıjeli jumystar atqarylyp keledi.
Óńirde áleýmettik mańyzy bar azyq-túlik taýarlarynyń baǵa ındeksi 98,8 paıyzdy qurap, respýblıkalyq ortasha kórsetkishten 1,5 paıyzǵa tómen qalyptasty. Sondaı-aq, taýarlar men qyzmetterge baǵa deńgeıi respýblıkalyq kórsetkishten tómen. Ony turaqty ustap turýǵa mán berilip otyr.
Alǵashqy kezekte naryqta halyq tutynatyn taýarlardyń qory jetkilikti bolýyna nazar aýdarylyp otyr. Ótken jyldan beri kókónis ósirýshi sharýashylyqtardy aldyn ala 70 paıyz qarjylandyryp, forvardtyq kelisimshart jasaý tájirıbege engizildi. Engizilgen ózgeristerden jáne júrgizilgen taýar ınterventsııasynan keıin kókónis baǵasy ótken jyldyń sáıkes kezeńimen salystyrǵanda birshama tómen. Bıyl da bul baǵyttaǵy jumystar jalǵasyp jatyr.
Negizgi azyq-túlik taýarlarynyń baǵasyn turaqtandyrý úshin ishki saýdadaǵy deldaldyq tizbekti qysqartý jáne saýda ústemesin 15 paıyzdan asyrmaýdy uıymdastyrý mindetteldi. Arnaıy komıssııa ázirlegen algorıtmge sáıkes baǵasy ósken ónimder boıynsha memlekettik kirister departamentinen alynǵan aqparat negizinde taldaý, memlekettik baqylaý júrgizý belgilengen. Osy rette Qyzylorda qalasy men aýdan ákimderine baǵany turaqty baqylaýda ustaý mindetteldi.
Májilis qorytyndysymen «Baıqońyr» áleýmettik kásipkerlik korporatsııasyna áleýmettik dúkender men buryshtarda 19 áleýmettik mańyzy bar negizgi azyq-túlik taýarynyń úzdiksiz satylýyn qamtamasyz etý, áleýmettik dúkender qyzmetin jetildirý boıynsha naqty usynys berý tapsyryldy. Odan bólek, oblystyq aýyl sharýashylyǵy jáne jer qatynastary, kásipkerlik jáne ónerkásip basqarmalary oblystyq saýda jáne tutynýshylardyń quqyqtaryn qorǵaý departamentimen birlesip, belgilengen algorıtmge sáıkes deldaldyq tizbekti qysqartý boıynsha tıisti jumys júrgizilip jatyr.
Oblysta áleýmettik mańyzy bar azyq-túlik ónimderiniń baǵasyn birqalypty ustaý úshin turaqtandyrý qorynyń taýarlyq ınterventsııasy men aınalym shemasy negizinde kásipkerlik sýbektilerine zaem berý arqyly júrgizilýde. Búginde turaqtandyrý qorynda 43,2 tonna qaraqumyq, 22,3 tonna qyryqqabat, 62,6 tonna kartop ónimi, 137,4 tonna sábiz, 150 tonna pııaz, 1,2 tonna makaron, 99,4 tonna kúnbaǵys maıy, 2113,6 tonna un bar.
Sondaı-aq, ótken jyldyń kúzgi óniminen forvardtyq negizde 4 982 tonna kókónis ónimin satyp alý jóninde kelisim jasaldy. Bul ónimderdiń 1450,4 tonnasy jetkizildi. Budan bólek, Túrkistan oblysynyń dıhandarymen sáýir, mamyr, maýsym aılarynda qyryqqabat ónimin 10-20 paıyz tómen baǵamen satyp alý jóninde kelisim jasaldy. Nan baǵasyn negizsiz ósirmeý maqsatynda turaqtandyrý qoryna 7 339 tonna un satyp alyndy. Qazirgi tańda oblysqa jetkizilgen un ónimderi naýbaıhanalarǵa taratylýda. Baǵany turaqtandyrý maqsatynda qabyldanǵan sharalardyń nátıjesinde, óńirde áleýmettik bólke nannyń ortasha baǵasy 99 teńge bolyp otyr.
Azyq-túlik taýarlarynyń baǵasyn naryqtan tómengi baǵada satý úshin qala jáne aýdandarda jármeńkeler ótkizilip jatyr. Máselen, jyl basynan beri 104 aýyl sharýashylyǵy ónimderiniń jármeńkesi uıymdastyrylyp, turǵyndarǵa áleýmettik mańyzy bar azyq-túlikter tómengi baǵada satyldy.
Turaqtandyrý qorynda áleýmettik mańyzy bar azyq-túlik qory jetkilikti. Qazirgi tańda jetkizilgen taýarlardy 35 áleýmettik jáne 8 iri saýda dúkenderge taratylyp jatyr. Qazirgi tańda pııaz 30, al jumyrtqa 50 teńgeden satylady. Aldaǵy ýaqytta basqa da áleýmettik mańyzy bar taýarlardyń baǵasyn tómendetý baǵytynda jumystar jalǵasyp jatyr. Sondaı-aq, oblys ákiminiń tapsyrmasy negizinde barlyq aýdanǵa jýa, kartop, sábiz ónimderin tıimdi baǵada jetkizý boıynsha jumystar júrgizilip jatyr. Mundaı aýqymdy jumystar aldaǵy ýaqytta jalǵasyn taba beredi.
