Qyzylorda oblysynda «Aýyl amanaty» jobasy aıasynda aýqymdy jumystar atqarylýda

QYZYLORDA. KAZINFORM — Qyzylorda oblysynda «Aýyl amanaty» jobasy aıasynda sońǵy eki jylda 601 joba (4,3 mlrd teńge) júzege asyrylyp, 917 jańa jumys orny ashyldy.

Bıyl 815 jobany (5,5 mlrd teńgege) iske qosyp, 1 myńnan astam (1060) jumys ornyn ashý josparlanǵan. Bul týraly Memleket basshysy Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda oblys ákimi Nurlybek Nálibaev atap ótti.

Osy baǵytta shaǵyn óndiris ortalyqtaryn qurýǵa basymdyq berilýde. Sharýashylyq qurylymdarynyń áleýmettik jaýapkershiligi sheńberinde kásibin bastaýshylardy ǵımaratpen, kepildikpen qamtamasyz etý tájirıbesi engizildi.

Eske salaıyq, ótken jyly «Óńirlik jumyspen qamtý kartasy» aıasynda 49 myńnan astam adam jumyspen qamtyldy. 

«Jumysshy mamandyqtary jyly» aıasynda bıyl agro-ındýstrııalyq jobalarǵa qajet mamandar daıarlaý úshin memlekettik tapsyrys sany 5 308 orynǵa deıin ulǵaıtyldy.

Aıta keteıik, buǵan deıin Qyzylorda oblysynda jańadan sý qoımasy men kanaldar salynatynyn jazǵanbyz.