Qyzylorda oblysynda asa iri mólsherde sıntetıkalyq esirtki tasymaldaǵan azamatsha ustaldy
QYZYLORDA. KAZINFORM — Qyzylorda oblysynda polıtseıler asa iri mólsherde sıntetıkalyq esirtki zatyn tasymaldaǵan azamatshany ustady.
Bul baǵytta Qyzylorda oblysynda QR Іshki ister mınıstrliginiń Baıqońyr qalasyndaǵy ókildiginiń polıtseıleri «Nashaqorlyqqa jol joq» jobasy aıasynda arnaıy jedel-izdestirý sharalaryn júrgizdi. Atalǵan shara oblystyq prokýratýranyń úılestirýimen ótkizildi.
— Іs-shara barysynda Aqtóbe qalasynan 5,66 gramm, asa iri mólsherde «mefedron» túrindegi sıntetıkalyq esirtki zatyn Baıqońyr qalasyna tasymaldaǵany úshin kúdiktelgen azamatsha ustaldy. Ol sıntetıkalyq esirtki zatyn zańsyz ıemdenip, ózimen birge saqtaǵan. Kúdiktige qatysty sot sanktsııasymen 2 aı merzimge kúzetpen ustaý bultartpaý sharasy qoldanyldy. Tergeý júrgizilip jatyr, — dep málim etti Qyzylorda oblystyq polıtsııa departamentinen.
Eske salsaq, budan buryn Qyzylorda oblysynda alaýyzdyq týdyratyn jazba taratqan turǵyn sottaldy.