Qyzylorda oblysynyń joldarynda aptap ystyqta júk kólikteriniń qozǵalysyna ýaqytsha shekteý engiziledi

QYZYLORDA. KAZINFORM - Qyzylorda oblysy aýmaǵynda asfalt jol jabyndysynyń buzylýyn boldyrmaý úshin respýblıkalyq joldardyń birqatar bóligine ýaqytsha shekteý engiziledi.

Qyzylorda oblysynda asfalt jol jabyndysynyń buzylýynyń aldyn alý úshin jalpy paıdalanylatyn respýblıkalyq mańyzy bar joldardyń birqatar bóliginde ýaqytsha shekteý engiziledi.

«Bul shekteý «Samara-Shymkent» avtojolynyń 1240-2055,5 shaqyrymyna árbir bilikke túsetin júktemesi 9 tonnadan artyq, «Qyzylorda-Pavlodar-Ýspenka-RF» avtojolynyń 12-24 shaqyrymyna árbir bilikke túsetin júktemesi 8 tonnadan artyq avtokólik quraldarynyń qozǵalysyna qatysty bolyp otyr. Atalǵan talap bıylǵy jyldyń 1 maýsym-31 tamyz aralyǵynda saqtalady. Aýa temperatýrasy +25˚S gradýstan asqan jaǵdaıda saǵat 10.00-den 22.00-ge deıin ýaqytsha shekteý engiziledi. Halyqaralyq júk tasymalyna, zardap shekken adamdarǵa gýmanıtarlyq kómek kórsetetin, azyq-túlik tasymaldaıtyn avtomokólikterge shekteýler qoıylmaıdy. Sondaı-aq, mundaı jeńildik tótenshe jaǵdaılardy joıýǵa jáne aldyn alý jónindegi is-sharalaryn júzege asyratyn kólikterge de jasalady», - dedi «QAJservıs» JShS Qyzylorda oblystyq fılıalynyń bólim basshysy Álıakbar Myrzabaı.