Qyzylorda oblysynda áleýmettik kásipkerlerge kóńil bólinýde
Osy jyly Qyzylordada kásipkerlik salasyndaǵy 2,5 myńnan asa jobaǵa qarjylaı qoldaý kórsetilgen. Osylaısha, bul kórsetkish Qyzylorda oblysynda 14,3 paıyzǵa ulǵaıdy. Munda ekonomıkalyq belsendi halyqtyń úshten biri, ıaǵnı 124 321 adam jumyspen qamtylǵan, dep habarlaıdy Kazinform Qyzylorda oblysynyń Óńirlik kommýnıkatsııalar qyzmetine silteme jasap.
Ótken jyldan bastap elimizde áleýmettik kásipkerlikti qoldaý jáne damytý maqsatynda áleýmettik kásipkerlik sýbektileriniń tizimi júrgizilýde. Búgingi kúni tizimge QR Ulttyq ekonomıka mınıstriniń buıryǵymen oblys boıynsha 8 kásipker engizildi. Tizimge engizilgen kásipkerlerge qarjylyq, múliktik, ınfraqurylymdyq, ınstıtýtsıonaldyq jáne aqparattyq qoldaý, salyqtyq jeńildikter sekildi memlekettik qoldaý sharalary kórsetiletin bolady.
Máselen, «Bıbi Aısha» tigin tsehynyń basshysy Gúlmıra Sarıeva 10 adamdy jumyspen qamtyp otyr. Onyń 6 qyzmetkeri áleýmettik osal toptarǵa jatady. Olardyń qatarynda, zeınetker, erekshe jandar men jalǵyzbasty analar. Kóbine qazaqy naqyshtaǵy kıimderdi tigýmen aınalysady. Sondaı-aq, 3 jyl qatarynan qala kúnine oraı ótkiziletin is-sharaǵa 100-300 adamǵa arnalǵan kıimderdi tigip keledi. Bıyl da Gúlmıra Sarıeva bastaǵan qyzmetkerler bir aı boıy qala kúnine óner kórsetetin órenderdiń kıimin tigýde.
Aımaqtaǵy áleýmettik kásipkerlerdiń biri – Darıha Ábildaeva. Ol – «Meıirim» balalarǵa arnalǵan korrektsııalyq-damytý ortalyǵynyń jetekshisi. Búginde bul ortalyqqa 3600-den astam adam qaralǵan. Dúnıege kelgen shaqalaq sábıden bastap, 40-ty eńsergen er-azamattarǵa deıin ortalyqqa júginedi.
Eresek azamattar logopedtiń kómegin qajet etedi. Al, búldirshinder arasynda tildiń kesh shyǵýy, aýtızm dertteri tym kóbeıip ketken. Tek Qyzylorda oblysynan ǵana emes, búkil respýblıka, tipti Italııa, Taıland memleketindegi qazaq otbasylary da dertine shıpa tapqan eken.
Darıha Ábildaevanyń aıtýynsha, ár balaǵa jeke kóńil bólý kerektigin jetkizdi. Kóp jaǵdaıda ata-ananyń balanyń damýyna beı-jaı qaraýynan tildiń damýy tejelip qalady eken. Sonymen qatar, mamandardy jıi oqytý kýrstary arqyly bilimin jetildirip otyratynyn aıtty. Polsha memleketinen arnaıy defektolog, logoped mamandary kelip, dáris oqyǵanyn jetkizdi.
