Qyzylorda oblysynda agroekonomıka jáne agrarlyq ǵylymdy damytý máselesi talqylandy
QYZYLORDA. KAZINFORM – Qyzylordada Memleket basshysynyń Joldaýyndaǵy negizgi baǵyttardyń biri agroekonomıka jáne agrarlyq ǵylymdy damytý máseleleri talqylanǵan jıyn ótti.
Basqosýǵa máslıhat depýtattary, basqarmalar men aýmaqtyq departament basshylary, ǵalymdar, sharýashylyq qurylymdarynyń ókilderi, onlaın baılanys arqyly Qyzylorda qalasy men aýdan ákimderi qatysty.
Óz kezeginde oblys ákimi sala basshylaryna Joldaýdan týyndaıtyn mindetterdi sapaly ári ýaqtyly júzege asyrý boıynsha naqty tapsyrmalar júktedi.
– Prezıdentimiz Joldaýynda: «Qoldanbaly aýyl sharýashylyǵy ǵylymyn jedel órkendetpeıinshe, agroónerkásip keshenin uzaq ýaqyt boıy qarqyndy damytý múmkin emes» degen bolatyn. Ásirese, agrarlyq salany tsıfrlandyrýǵa, aýyl sharýashylyǵy ǵylymyn jetildirýge negizgi basymdyq berýdi erekshe atap ótip, bes mindetti aıqyndady.
Birinshi kezekte aýyl sharýashylyǵy salasyna jańa tásilderdi, zamanaýı tehnologııalar men tsıfrlyq sheshimderdi, jasandy ıntellektini engizý, ekinshi, ónimdilik pen qaıta óńdeýdi arttyrý, úshinshi, tehnologııalyq jańǵyrtý, tórtinshi, ǵylym men zertteýdi damytý, besinshi, qarjylaı qoldaý kórsetý kerek.
Agrarlyq salaǵa tsıfrlyq tehnologııalardy keńinen qoldaný, tereń óńdeý baǵytyndaǵy jumys basa mán berýdi qajet etedi. Ǵylymdy damytyp, tsıfrlyq tehnologııalardy qoldanýdyń tıimdiligin sharýashylyq qurylymdaryna túsindirý qajet. Salany jetildirýge arnalǵan ǵylymı jobalardy qoldap, olardy iske asyrýdy súıemeldep, tsıfrlandyrýdaǵy tyń bastamalardy óndiriske engizýdi qarastyryńyzdar. Ybyraı Jaqaev atyndaǵy Qazaq kúrish ǵylymı zertteý ınstıtýty bilim berý ortalyǵynyń jumysyn jandandyrý, ǵylymmen aınalysatyn bilikti mamandar daıarlaý óte mańyzdy. Oqý oryndaryn bitirgen túlekterdi jumysqa tartý kerek.
Prezıdentimizdiń senimin aqtaý – barshamyzdyń ortaq paryzymyz. Sondyqtan osy baǵytta atqaratyn jumystarymyz júıeli, nátıjeli bolsyn. Búgingi berilgen barlyq tapsyrmanyń oryndalýy turaqty baqylaýymyzda bolady. Júktelgen mindetterdi jaýapkershilikpen birlese atqarýǵa shaqyramyn, - dedi Nurlybek Mashbekuly.
Memleket tarapynan jyl saıyn bólingen qarjynyń arqasynda ótken 8 aıdyń qorytyndysymen aýyl sharýashylyǵynda 66 mlrd. 900 mln. teńgeniń ónimi óndirilip, byltyrǵy sáıkes kezeńmen salystyrǵanda 2,5 paıyz, tamaq ónimderin óńdeý kólemi 16 paıyz artqan.
Jıynda oblystyq aýyl sharýashylyǵy jáne jer qatynastary basqarmasynyń basshysy Talǵat Dúısebaev kúrish kólemin kezeń-kezeńimen ońtaılandyryp, sýdy az qajet etetin daqyldardy jersindirý týraly habarlama jasady.
Y.Jaqaev atyndaǵy Qazaq kúrish ǵylymı-zertteý ınstıtýtynyń dırektory, oblystyq qoǵamdyq keńes tóraǵasy Sultanbek Táýipbaev agrarlyq ǵylymdy jedel órkendetý arqyly agroónerkásip keshenin qarqyndy damytý múmkindikterine toqtaldy.
«Er-Áli» sharýa qojalyǵynyń tóraǵasy Álibı Bekjanov tsıfrlandyrý tásilderi arqyly óndiris tıimdiligin arttyrý, Qorqyt Ata atyndaǵy Qyzylorda ýnıversıtetiniń rektory Beıbitkúl Kárimova bilikti kadr daıyndap, ozyq ǵylymı jobalardy óndiriske engizý, sala ardageri, memleket jáne qoǵam qaıratkeri Bekmyrza Elamanov sý tapshylyǵy jaǵdaıynda qoldanylǵan tájirıbeler jaıynda pikir bildirdi.