Qyzylorda oblysynda 9 túıeni atyp, soıyp alǵan qylmystyq top ustaldy

QYZYLORDA. KAZINFORM - Qyzylorda oblysynda mal urlyǵymen aınalysqan 24-30 jastaǵy qylmystyq top músheleri dalada jaıylyp júrgen jerinen 9 túıeni atyp, soıyp alyp ketken.

Qyzylorda oblysy polıtsııa departamenti jáne Qazaly aýdandyq polıtsııa bóliminiń jedel ýákilderi túıe urlaǵan kúdiktilerdi qolǵa túsirdi. Bıyl aqpan aıynda Áıteke bı kentiniń turǵyndarynań aryz tústi. Onda túıe maldary qoldy bolǵany aıtylǵan.

Polıtsııa qyzmetkerleri jedel-izdestirý sharalaryn júrgizdi. Nátıjesinde qanshama maldy qoldy etken urylardy anyqtady.

«Tekserý barysynda olardyń 9 túıeni dalada jaıylyp júrgen jerinen atyp, soıyp alyp ketkendigi belgili boldy. Qylmysqa kúdikti retinde 24-30 jastaǵy azamattar ustalyp, bólimniń ýaqytsha ustaý ızolıatoryna qamaldy. Aıǵaq zat retinde ańshy myltyǵy men onyń patrony, pyshaqtar, mal terisi alyndy. Qazirgi tańda kúdiktilerge qatysty urlyq deregi boıynsha qylmystyq is tirkelip, sotqa deıingi tergep-tekserý áreketteri júrgizilýde», - dep málim etti Qyzylorda oblystyq polıtsııa departamentinen. 

Polıtsııa qyzmetkerleri kúdiktilerdiń oblys aýmaǵyndaǵy basqa da qylmystarǵa qatystylyǵyn tekserip jatyr.

Eske salsaq, budan buryn Qyzylordada 110 qap kúrish urlaǵan qylmystyq toptyń tórt múshesi ustaldy.