Qyzylorda oblysynda 83 zańsyz qoqys orny joıyldy
ASTANA. KAZINFORM – «Taza Qazaqstan» respýblıkalyq ekologııalyq aktsııasy aıasynda Qyzylorda oblysynda 83 zańsyz qoqys orny anyqtalyp, joıyldy.
Qyzylorda oblysynyń prokýratýrasy ýákiletti organdarmen birlesip jumys tobyn quryp, zańsyz qoqys oryndaryn anyqtaý jáne joıý boıynsha birqatar jumys júrgizdi.
Aktsııa aıasynda vedomstvoaralyq májilister ótkizilip, turǵyndar arasynda túsindirý jumystary uıymdastyryldy.
Jumys toby oblys aýmaǵynda turmystyq qaldyqtar zańsyz ornalastyrylǵan oryndardy anyqtady. Osyǵan baılanysty ýákiletti organdarǵa tıisti sharalar qabyldaý jóninde tapsyrmalar berilip, qoqys úıindilerin joıý jumystary qolǵa alyndy.
Atqarylǵan jumystar nátıjesinde 83 zańsyz qoqys orny anyqtalyp, olardyń barlyǵy sanıtarııalyq talaptarǵa sáıkestendirildi.
Arnaıy polıgondarǵa 700 tonnadan astam qaldyq shyǵaryldy.
Sonymen qatar ekologııalyq zańnama talaptaryn buzyp, qorshaǵan ortany lastaǵan 590 azamat ákimshilik jaýapkershilikke tartyldy.
Qazirgi ýaqytta jumys toby problemalyq ýchaskelerdi belgilep, ol aımaqtarǵa beınebaqylaý kameralary men arnaıy eskertý belgilerin ornatý jumystaryn qolǵa aldy.
– Azamattardy qorshaǵan ortany qorǵaýǵa jaýapkershilikpen qarap, turmystyq qaldyqtardy belgilengen oryndarǵa tastaýǵa jáne týǵan ólkeniń tazalyǵyn saqtaýǵa shaqyramyz, – dep málimdedi prokýratýra.
Aıta keteıik, ShQO-da jyl basynan beri 130-ǵa jýyq zańsyz qoqys úıindisi anyqtaldy.
