Qyzylorda oblysynda 8 jańa dárigerlik ambýlatorııa salyndy
ASTANA. KAZINFORM – «Aýyldyq densaýlyq saqtaýdy jańǵyrtý» ulttyq jobasynyń sheńberinde Qyzylorda oblysynda 8 jańa dárigerlik ambýlatorııa salyndy. Bul týraly Densaýlyq saqtaý mınıstrligi habarlady.
Atap aıtqanda, Shıeli aýdandyq kópbeıindi aýrýhanasynyń janyndaǵy Bala bı, Dosbol bı, Qarǵaly, Ortaqshyl, Almaly, Tájibaev, Tartoǵaı jáne Bestam eldi mekenderinde buryn jumys istep turǵan dárigerlik ambýlatorııalar tozǵan jáne apatty dep tanyldy.
Sońǵy eki jylda olardyń ornynda jergilikti turǵyndardy qabyldaıtyn zamanaýı jabdyqtarmen jabdyqtalǵan jańa nysandar salyndy.
Jańa ambýlatorııalarda:
➤ jabdyqtary bar fızıoterapııa kabınetteri
➤ emdik dene shynyqtyrý kabınetteri,
➤ dárihana jáne dári-dármek qoımasy,
➤ akýsherlik, hımızator kabınetteri, súzgi kabıneti, tirkeý bólimi kózdelgen.
1974 jyly «asar» ádisimen salynǵan jáne apatty dep tanylǵan aýdandyq aýrýhananyń ınfektsııalyq aýrýlar bólimshesi tolyǵymen 2025 jyldyń tamyzynda paıdalanýǵa berilgen 30 tósektik jańa ǵımaratpen aýystyryldy. Bólimshe táýlik boıy jumys isteıdi jáne ınfektsııalardy erte anyqtaýǵa, oqshaýlaýǵa jáne emdeýge tolyq daıyn.
Bul jobalardyń barlyǵy medıtsınalyq qyzmetterdiń sapasyn arttyrýǵa jáne Shıeli aýdanynyń turǵyndary úshin qoljetimdi jáne zamanaýı medıtsınalyq kómekti qamtamasyz etýge baǵyttalǵan.