Qyzylorda oblysynda 8 aıda 62 adam jol apatynan kóz jumdy
QYZYLORDA. KAZINFORM – Jyl basynan beri Qyzylorda oblysynyń joldarynda 811 jol-kólik oqıǵasy tirkeldi.
Oblystyq polıtsııa departamentiniń málimetinshe, bul kórsetkish ótken jyldyń 8 aıymen salystyrǵanda 15,6%-ǵa tómen. Joldaǵy qaıǵyly jaǵdaılardyń kesirinen 1002 adam jaraqat alsa, 62 adam kóz jumǵan.
- Jol-kólik oqıǵalarynyń aldyn alý jáne júrgizýshilerdiń tártibin arttyrý maqsatynda 17 jedel profılaktıkalyq is-shara uıymdastyryldy. Profılaktıkalyq jumystyń nátıjesinde jol qozǵalysy qaǵıdalaryn buzýdyń 248 myńnan astam deregi anyqtaldy. Onyń ishinde kólik quralyn masań kúıde basqarýdyń 589, qarsy baǵytqa shyǵýdyń 264 deregi tirkeldi. 6973 jaǵdaıda jaıaý júrginshiler jol qozǵalysy qaǵıdalaryn buzsa, 90 myńnan astam jaǵdaıda júrgizýshiler jyldamdyqty shekten asyrǵan. 12 myńnan astam adam kólik tizgininde kele jatyp uıaly telefon paıdalansa, 35 myńnan astam júrgizýshi qaýipsizdik beldigin taqpaǵan. 4575 derek boıynsha kólik júrgizýshileri jaıaý júrginshige jol bermegen, - dedi departamenttiń ákimshilik polıtsııa basqarmasynyń bastyǵy, polıtsııa polkovnıgi Muratbek Manatov.
Búginde oblys joldarynda jol erejesin elemegenderdi avtomatty túrde anyqtaıtyn 218 zamanaýı qurylǵy jumys istep tur. Byltyr olardyń sany 124 bolatyn.
Eske salaıyq, Qyzylorda oblystyq polıtsııa departamenti jedel basqarý ortalyǵynyń qyzmetkerleri jýyrda túngi ýaqytta jol erejesin óreskel buzyp, qala aýmaǵynda avtokólik kortejin uıymdastyrǵan júrgizýshilerdi anyqtady.
