Qyzylorda oblysynda 70-ke jýyq jazasyn óteýshi otbasyn qurdy

QYZYLORDA. KAZINFORM – Qyzylorda oblystyq qylmystyq atqarý júıesi departamentiniń mekemelerinde  myńnan astam  adam jazasyn ótep jatyr.

Departamenttiń baspasóz qyzmeti habarlaǵandaı, olardyń arasynda jańa ómirge betburys jasap, otbasyn qurǵandar az emes.

- Jyl basynan beri 6 adam zańdy nekege turǵan. Ótken jyly 70-ke jýyq adam shańyraq kótergen. Jýyrda urlyq baby boıynsha sottalǵan taǵy bir azamat súıiktisimen nekesin zańdastyrdy, - delingen habarlamada.

Keıipkerimiz otbasylyq ómirge úlken daıyndyqpen kelgen.

- Mekemede ótkiziletin psıhologııalyq trenıngterden ótip turamyn. Oǵan qosa turaqty jumysym bar. Mekemeniń óndiris aımaǵyndaǵy jeke kásipkerde qolóner buıymdaryn jasaımyn. Úıde otbasym kútip otyrǵan soń mende úmit te, arman da paıda boldy, - dedi keıipkerimiz.

Mekeme mamandarynyń aıtýynsha, sottalǵandardyń nekege turýyna barlyq zańdy jaǵdaı jasalǵan. Olar, aldymen, mekeme zańgerlerinen keńes alyp, ótinish rásimdeıdi. Keıin AHAT bóliminiń qyzmetkerleri neke qııý rásimin ótkizip, neke kýáligin tabystaıdy.

- Túzeý mekemelerinde neke qııý jazasyn óteýshilerge oń áserin tıgizedi. Otbasyly bolǵan azamattar tártibin túzep, merziminen buryn bosap shyǵýǵa umtylady. Ómirge kózqarasy ózgerip, qoǵamdaǵy ornyn tabýǵa talpynady. Bostandyqqa shyqqan soń otbasy aldyndaǵy jaýapkershilikti tereń sezinedi. Ótinish bildirýshilerdiń arasynda uzaq jyl birge ómir súrgenimen resmı nekege turmaǵandar da kezdesedi, - deıdi №60 mekemeniń zańgeri Ardaq Іzmaǵanbetova.

Eske salsaq, ótken jyly oblysta100-den astam sottalǵan adamǵa qoǵamdyq jumys túrindegi jaza taǵaıyndaldy.