Qyzylorda oblysynda 6 myń turǵyn tabıǵı gazǵa qol jetkizedi
ASTANA. KAZINFORM – Qazaqstan Respýblıkasy Energetıka vıtse-mınıstri Sanjar Jarkeshov Qyzylorda oblysynyń turǵyndarymen kezdesý ótkizip, óńirdiń energetıkalyq ınfraqurylymyn damytý máseleleri týraly aıtyp, turǵyndardyń suraqtaryna jaýap berdi.
Vıtse-mınıstr gaz ınfraqurylymyn damytý jóninde aqparat berdi.
Búginde Qyzylorda oblysynda gazdandyrý deńgeıi 83,2%-dy quraıdy. Tabıǵı gazǵa 704 myńǵa jýyq turǵyn men 60 eldi meken qol jetkizgen. 2026 jyly gazben jabdyqtaý boıynsha 13 jańa jobany iske asyrýdy bastaý, sondaı-aq Aqjarma, Sabalaq jáne Qamystybas eldi mekenderinde gaz jelileriniń qurylysyn aıaqtaý josparlanyp otyr.
Nátıjesinde tabıǵı gazǵa qosymsha 6 myńǵa jýyq turǵyn qol jetkizedi. Kezdesý barysynda elektr energetıkasyn damytý máseleleri de qaraldy. Óńirdegi elektrmen jabdyqtaý senimdiligin arttyrý maqsatynda qýaty 240 MVt bolatyn zamanaýı bý-gaz qondyrǵysy paıdalanýǵa berildi.
«Jasyl» energetıkany damytý jóninde sóz sóılegen Sanjar Jarkeshov Qyzylorda oblysynda búginde jalpy qýaty 129 MVt bolatyn jańartylatyn energııa kózderiniń segiz nysany jumys isteıtinin atap ótti.
2027 jyldyń sońyna deıin jalpy qýaty 210 MVt bolatyn taǵy jeti jobany iske qosý josparlanǵan. Al bıylǵy aýktsıondyq saýda-sattyqtyń qorytyndysy boıynsha aıqyndalǵan jobalar 2028 jyldyń sońyna deıin júzege asyrylady. Turǵyndar gazben, elektrmen jáne jylýmen jabdyqtaýǵa qatysty máselelerdi kóterdi. Vıtse-mınıstr árbir kóterilgen másele boıynsha jan-jaqty túsinikteme berip, óńirdiń energetıkalyq ınfraqurylymyn damytý baǵytynda qabyldanyp jatqan sharalar týraly aıtyp ótti.
Kezdesý qorytyndysynda vıtse-mınıstr Qyzylorda oblysynyń otyn-energetıka keshenin damytýǵa qatysty barlyq máseleler Energetıka mınıstrliginiń turaqty baqylaýynda ekenin atap ótti.
Osyǵan deıin Qostanaıdaǵy jańa óndiristerge gaz jetkizetin qubyr salynatyny týraly jazdyq.
