Qyzylorda oblysynda 52 memlekettik qyzmetker tártiptik jazaǵa tartyldy

QYZYLORDA. KAZINFORM — Ótken jyly Qyzylorda oblysynda memlekettik qyzmet salasynda 6 mln 210 myńnan astam  qyzmet kórsetilgen.

Memlekettik qyzmet isteri agenttiginiń Qyzylorda oblysy boıynsha departamenti tekserý jáne qashyqtyqtan monıtorıng júrgizý nátıjesinde 11 744 buzýshylyqty anyqtady. Kemshilikterdi joıý jónindegi usynystar aıasynda 52 qyzmetker tártiptik, 12 adam ákimshilik jazaǵa tartyldy.

— Qyzmet kórsetý sapasyna qatysty 91 ótinish tússe, onyń 20-sy boıynsha tekserý júrgizildi. 18 qyzmet alýshynyń dálelderi rastaldy, quqyǵy qalpyna keltirilip, qorǵaldy. Jyl kóleminde 735 qyzmet alýshynyń quqyǵy qalpyna keltirildi. Qoǵamdyq keńestiń 7 otyrysy ótip, onda 15 másele talqyǵa tústi. Vedomstvoaralyq jumys tobynyń 4 otyrysynda 16 organǵa 34 usynys joldadyq. Olar tolyǵymen oryndaldy, — dedi departament basshysy Erlegen Meńdalıev. 

Aıta keteıik, jýyrda Májiliste «QR Memlekettik qyzmeti týraly» zań jobasy birinshi oqylymda maquldandy.