Qyzylorda oblysynda 51 mlrd teńgeniń júgeri men soıany qaıta óńdeý jobasy iske asyrylyp jatyr

ASTANA. KAZINFORM - Qyzylorda oblysynda aýyl sharýashylyǵy daqyldaryn ósirý jáne olardy tereń óńdeýge baǵyttalǵan iri agrarly joba júzege asyrylyp jatyr, jobanyń bastamashysy – shveıtsarııalyq Harvest Agro kompanııasy.

QR Aýyl sharýashylyǵy mınıstrligi baspasóz qyzmetiniń habarlaýynsha, joba 2025 jylǵy qazanda Qazaqstan Respýblıkasynyń Aýyl sharýashylyǵy mınıstrligi, Qyzylorda oblysynyń ákimdigi jáne Harvest Agro kompanııasy arasynda qol qoıylǵan úshjaqty Negizdemelik kelisim aıasynda qolǵa alynǵan. Jalpy aýmaǵy 23,5 myń gektar jer teliminde júgeri jáne soıa daqyldaryn ósirý jáne qaıta óńdeý josparlanǵan.

Jobanyń birinshi kezeńin iske qosý 2026 jylǵa belgilengen. Osy kezeń aıasynda 8,5 myń gektar sýarmaly jer aınalymǵa engizilip, tuqym óńdeý zaýyty salynatyn bolady.

Ekinshi kezeńde egis alqaptarynyń kólemin eki esege ulǵaıtyp, aýyl sharýashylyǵy ónimderin qaıta óńdeý qýatyn jylyna 60 myń tonnaǵa deıin jetkizý kózdelip otyr.

Bolashaqta jyl saıynǵy óndiris kólemi 70 myń tonna júgerini jáne 20 myń tonna soıany quraıdy dep josparlanǵan.

Qazirgi tańda 6 myń gektar jerdiń josparlaý jumystary aıaqtaldy, taǵy 8,5 myń gektar aýmaqta jerdi tegisteý jumystary bastaldy. Óndiristik jumystarǵa 110 arnaıy tehnıka tartylǵan, 15 jańbyrlatyp sýarý júıesi ornatylyp jatyr, sondaı-aq zamanaýı ortalyq tirekti sýarý tehnologııasy qoldanylýda.

Aıta ketý kerek, joba Memleket basshysynyń óńirde egis alqaptaryn ártaraptandyrý jáne sýarmaly sýdy az qajet etetin aýyl sharýashylyǵy daqyldaryna kóshý jónindegi tapsyrmasy aıasynda iske asyrylady.

Osy turǵyda júgeri egis alqaptaryn keńeıtýge erekshe kóńil bólinip otyr. Ótken jyly bul daqyl 1,7 myń gektarǵa egilse, bıyl atalǵan kórsetkishti 10 myń gektarǵa deıin ulǵaıtý mejelengen.

Osyǵan deıin bıdaı men júgeri óńdeý salasyna 2,6 mlrd dollar ınvestıtsııa tartylǵany týraly jazdyq.