Qyzylorda oblysynda 5 jylda qylmys sany 20,7 paıyzǵa azaıdy
QYZYLORDA. KAZINFORM — Ótken jyly Qyzylorda oblysynda tirkelgen quqyqbuzýshylyq sany 2%-ǵa tómendedi. Qoǵamdyq oryndar men kóshede, mas kúıinde jasalǵan qylmys ta azaıǵan.
Oblystyq polıtsııa departamentiniń málimetinshe, 5 jylda qylmys sany 20,7%-ǵa qysqardy.
— Tsıfrlyq tehnologııa damyǵan saıyn jańa qaýip kóbeıdi. Onyń biri — kıberqylmys. Qazirgi ýaqytta áleýmettik jeli arqyly jasalatyn alaıaqtyq jıiledi. Departament kıberqylmyspen kúres baǵytynda arnaıy bólinistiń jumysyn kúsheıtti. Bankter, túrli baılanys operatorlary jáne basqa da uıymdarmen birlesip jumys atqarylyp jatyr. Alaıaqtyq belgisi bar 7 myńǵa jýyq saıt, silteme anyqtalyp, buǵattaý úshin «Kıberbaqylaý» júıesine engizildi. «Antıfrod» júıesine 974 ıntsıdent engizilip, 18 mln teńgeden astam qarajat buǵattaldy, — delingen habarlamada.
Oblys joldarynda jol apatynyń aldyn alý, qaýipsizdik mádenıetin qalyptastyrý jáne azamattardyń jaýapkershiligin arttyrýǵa den qoıylǵan. Ótken jyly jol erejesin buzýdyń 304 myńnan asa deregi anyqtalsa, onyń 176 myńnan astamy nemese 58%-y — jol apatyna tikeleı áser etetin óreskel quqyqbuzýshylyqtar.
Eske sala ketsek, buǵan deıin jyl basynan elimizde qylmys sany 8 paıyzǵa azaıǵany týraly Úkimet otyrysynda Іshki ister mınıstri Erjan Sádenov aıtqan edi.
