Qyzylorda oblysynda 43 myń gektar jer memleket menshigine qaıtaryldy

QYZYLORDA. KAZINFORM — Bıyl Qyzylorda oblysyndaǵy 60 myń gektar jerdi memleket menshigine qaıtarý josparlanǵan. Búgingi kúni sonyń 43 myń gektary memleket menshigine qaıtaryldy.

Oblystyq aýyl sharýashylyǵy jáne jer qatynastary basqarmasynyń baspasóz qyzmeti habarlaǵandaı, osylaısha jospardyń 71,1%-y oryndaldy. 

— Memleket basshysynyń tapsyrmasy boıynsha 2024 jyly 70 myń gektar jerdi qaıtarý kózdelip, jyl sońynda 77,5 myń gektar jer alyndy. 2022-2024 jyldary qaıtarylǵan 460,2 myń gektar jerdiń 93,6 myń gektary qaıtadan aınalymǵa endi, — delingen habarlamada.

Statıstıkalyq málimetke súıensek, Qyzylorda oblysynyń jer kólemi — 24,1 mln gektar. Onyń 2,9 mln gektary aýyl sharýashylyǵyna arnalǵan.

Buǵan deıin biz Batys Qazaqstanda 3,5 myń gektar aýyl sharýashylyǵy jeri memleket menshigine qaıtarylǵanyn jazǵan edik.