Qyzylorda oblysynda 400-den astam turǵyn dárigerlerden keńes aldy
QYZYLORDA. KAZINFORM – «Bilimimiz – Elimizge» áleýmettik jobasy aıasynda Shıeli aýdanynda 400-den astam turǵyn dárigerlerden tegin keńes aldy.
- Jobanyń negizgi is-sharalary Shıeli aýdanynda ótti. Astana men Almaty qalalarynan kelgen «Bolashaq» baǵdarlamasynyń túlekteri jergilikti turǵyndarǵa medıtsınalyq keńes berip, aýdan jastaryna kásibı baǵdar boıynsha kezdesýler ótkizdi. Medıtsınalyq qabyldaýǵa balalar kardıohırýrgııasy, ınterventsııalyq kardıologııa, akýsherııa jáne gınekologııa, ýrologııa, otorınolarıngologııa, endokrınologııa, ınfektsııalyq aýrýlar jáne psıhologııa salalarynyń mamandary qatysty, - dedi Bolashaq medicine club jetekshisi Daýlet Jaqypbaev.
Bir kúnde dárigerler 400-den astam patsıentti qabyldady. Keńes berý qorytyndysy boıynsha 40-qa jýyq turǵynǵa qosymsha tekserýden ótý jáne respýblıkalyq medıtsınalyq ortalyqtarda kúrdeli em alý usynyldy.
Joba aıasynda aýdan oqýshylary men kolledj stýdentterine arnalǵan mentorlyq kezdesýler de uıymdastyryldy. Qatysýshylar mamandyq tańdaý, shetelde bilim alý múmkindikteri, aǵylshyn tilin meńgerýdiń mańyzy, kásibı damý jáne jeke motıvatsııa taqyryptaryn talqylady. Kezdesýlerge 600-den astam oqýshy men stýdent qatysty.
Qyzylorda oblysy ákiminiń orynbasary Meırambek Shermaǵambetovpen ótken kezdesýde jobanyń qorytyndysy shyǵaryldy. Jıynda Shıeli aýdanynda atqarylǵan jumystardyń nátıjeleri, «Bolashaq» túlekter qaýymdastyǵynyń qyzmeti men negizgi jobalary tanystyryldy. Taraptar densaýlyq saqtaý, bilim berý jáne jastarmen jumys isteý baǵyttaryndaǵy yntymaqtastyqty jalǵastyrý, sondaı-aq «Bolashaq» baǵdarlamasy túlekteriniń kásibı áleýetin óńirlerdegi áleýmettik bastamalarǵa tartý máselelerin talqylady.
Jobany «Bolashaq» qaýymdastyǵy «Qazatomónerkásip» UAK» AQ men Qyzylorda oblysy ákimdiginiń qoldaýymen júzege asyrdy.
«Bilimimiz – Elimizge» jobasy 10 jyldan astam ýaqyttan beri iske asyrylyp keledi. Onyń negizgi maqsaty – «Bolashaq» baǵdarlamasy túlekteriniń bilimi men halyqaralyq tájirıbesin el ıgiligine baǵyttaý.
Jobanyń medıtsınalyq baǵyty tórt jyldan beri júzege asyp keledi. Bastamanyń negizin qalaǵan dáriger-arıtmolog, «Bolashaq» túlegi Ǵanı Tólepbergenov bıyl ómirden ótti.
Qaýymdastyq músheleri men áriptesteri sapardy Ǵanı Tólepbergenovtiń rýhyna arnady. Onyń medıtsına salasyndaǵy eńbegi men kásibı murasyn ulyqtaý maqsatynda jobanyń medıtsınalyq baǵytyna dárigerdiń esimin berý týraly sheshim qabyldandy.
