Qyzylorda oblysynda 40 mlrd teńgelik júgeri óńdeý jobasynyń alǵashqy kezeńi iske qosyldy
ASTANA. KAZINFORM- – Qyzylorda oblysynyń Syrdarııa aýdanynda «Qyzylorda krahmal-sirne zaýyty» ınvestıtsııalyq jobasynyń alǵashqy kezeńi – júgerini keptirý jáne saqtaý kesheni iske qosyldy. Jalpy quny 40 mlrd teńgeni quraıtyn joba aıasynda bir mezgilde 20 myń tonna júgeri saqtaýǵa múmkindik bar.
QR Aýyl sharýashylyǵy mınıstrligi baspasóz qyzmetiiń habarlaýynsha, jalpy aýmaǵy 35 gektar jerdi qamtıtyn joba eki kezeń boıynsha júzege asyrylady. Birinshi kezeńde júgerini keptirý jáne saqtaý kesheni paıdalanýǵa berildi. Al ekinshi kezeńde júgerini tereń óńdep, krahmal men sirne óndiretin zaýyt salý josparlanyp otyr.
Jobany iske asyrý óńirde aýyl sharýashylyǵy shıkizatyn saqtaýǵa jáne óńdeýge arnalǵan zamanaýı ınfraqurylym qalyptastyrýǵa, jergilikti aýyl sharýashylyǵy taýaryn óndirýshilerdiń ónim ótkizý múmkindikterin keńeıtýge, sondaı-aq júgeri egistiginiń kólemin ulǵaıtýǵa múmkindik beredi.
Sonymen qatar óńdeý qýattarynyń artýy aýyl sharýashylyǵy óndirisin ártaraptandyrýǵa jáne qosylǵan quny joǵary ónimderdiń úlesin kóbeıtýge jol ashady.
Bıyl óńirde dándik júgeri 11 myń gektar alqapqa egilip, 60 myń tonnadan astam ónim jınaldy. Atalǵan baǵytty odan ári damytý jáne bolashaq zaýytty qajetti shıkizatpen qamtamasyz etý maqsatynda arnaıy Jol kartasy bekitildi. Qujatqa sáıkes, 2027 jyly júgeri egistiginiń kólemin 28 myń gektarǵa deıin ulǵaıtý kózdelip otyr.
Jobany júzege asyrý barysynda aýyl sharýashylyǵy taýaryn óndirýshiler men óńdeý kásiporyndary arasyndaǵy óndiristik kooperatsııany damytýǵa erekshe mán berilip otyr.
Ónimdi keptirý men saqtaýǵa arnalǵan zamanaýı óndiristik nysandardyń iske qosylýy jáne aldaǵy ýaqytta tereń óńdeý zaýytynyń salynýy aýyl sharýashylyǵy óndirisiniń tıimdiligin arttyrýǵa, ónim ótkizýdiń turaqty arnalaryn qalyptastyrýǵa jáne óńirde júgeri ósirý salasyn damytýǵa qosymsha serpin beredi.
Osyǵan deıin Qyzylordada kúrish alqaby 11 myń gektarǵa qysqaryp, ornyna dándik júgeri egilgeni týraly jazdyq.
