Qyzylorda oblysynda 4 dárigerlik ambýlatorııa ashyldy
Jańa jyl qarsańynda Qyzylorda oblysy Shıeli aýdanynyń Talaptan aýyldyq okrýginde jańa dárigerlik ambýlatorııa ashyldy, dep habarlaıdy QR Densaýlyq saqtaý mınıstrliginiń baspasóz qyzmeti.
"Óńirde halyqqa medıtsınalyq qyzmetterdiń qoljetimdiligin qamtamasyz etýge, salanyń ınfraqurylymyn jańǵyrtýǵa baǵyttalǵan keshendi sharalar qabyldanýda. Memleket basshysynyń bastamasymen "Aýyldyq densaýlyq saqtaýdy jańǵyrtý" ulttyq jobasynyń sheńberinde óńirdiń aýyldyq jerlerinde 27 medıtsınalyq obektiniń qurylysy júrgizilýde. Búginde oblys boıynsha 15 ambýlatorııanyń qurylysy aıaqtaldy. Jańa obektiler turǵyndardyń ıgiligi úshin qyzmet etsin", - dedi oblys ákimi N.Nálibaev.
Qoǵam qaıratkeri Murat Baqtııaruly jerlesterin qýanyshty oqıǵamen quttyqtady. Aqsaqal, Eńbek ardageri Seıtmaǵanbet Jumanazaruly dástúr boıynsha batasyn berdi.
Bir qabatty ǵımarat dızeldi otynmen jumys isteıtin jeke qazandyqtyń esebinen jylytylady. Dál osyndaı ambýlatorııanyń ǵımaraty aýdannyń taǵy bir aýyldyq eldi mekeninde – Aqtoǵaı aýyldyq okrýginde paıdalanýǵa berildi.
Buryn habarlanǵandaı, Qyzylordada quny 36,4 mlrd teńge bolatyn bir aýysymda 100 adam qabyldaıtyn emhana, onkologııa bólimshesi bar 300 tósek-orynǵa arnalǵan kópbeıindi aýrýhananyń qurylysy bastaldy. Quny 2,9 mlrd teńge bolatyn qan ortalyǵy jaqyn arada paıdalanýǵa beriledi. Sondaı-aq 9 densaýlyq saqtaý obektisine kúrdeli jóndeý júrgizildi, onyń beseýinde jylytý júıesi gazǵa aýystyryldy.
Jyl sońyna deıin oblystyq aýrýhanada 70 oryndyq perınataldyq ortalyq, qala mańyndaǵy Dosan aýylynda medıtsınalyq qyzmet kórsetý stantsııasy, Jańaqorǵan kópbeıindi aýrýhanasynyń bazasynda "Qamqorlyq" ońaltý ortalyǵy ashylady.
Kúnniń ekinshi jartysynda oblys ákimi Qarǵaly aýyldyq okrýginiń Bulanbaı baýy eldi mekeninde ambýlatorııa ashý rásimine qatysty.
Óńir basshysy aýyl turǵyndaryn jańa obektiniń ashylýymen quttyqtap, atqarylǵan jumystar men medıtsına salasyndaǵy aldaǵy mindetter týraly aıtyp berdi. Aýyl turǵyndaryn "Qurmet" ordeniniń ıegeri, metsenat Seıtqalı Alshynbaev ta quttyqtady. Eńbek ardageri Alpysbek Táshimbet óz batasyn berdi. Sondaı-aq, osy kúnderi Jańaqorǵan aýdanynyń Qaratóbe aýyldyq okrýginde taǵy bir dárigerlik ambýlatorııa ashyldy.
