Qyzylorda oblysynda 4 adam koronavırýs ınfektsııasyn juqtyrdy

QYZYLORDA. KAZINFORM - Qyzylorda oblysynda jyl basynan beri koronavırýs ınfektsııasyn juqtyrýdyń 4 deregi anyqtaldy. Byltyr naýqastar sany 118 adam bolǵan. 

Qyzylorda oblysynda koronavırýs ınfektsııasy boıynsha epıdemıologııalyq ahýal turaqty. 2022 jylmen salystyrǵanda 55 ese tómendegen.

«2023 jyly oblys boıynsha koronavırýs ınfektsııasyn juqtyrýdyń 118 deregi anyqtaldy. Onyń ishinde 14 jasqa deıingi balalar úlesi 47 derek. Basym bóligi aýrý sımptomymen naqtylandy. Bıyl jyl basynan beri atalǵan aýrýǵa shaldyǵýdyń 4 jaǵdaıy tirkeldi», - dedi Qyzylorda oblysy Sanıtarlyq-epıdemıologııalyq baqylaý departamenti basshysynyń orynbasary Álııa Ábdiqaıymova.

Mamandar vırýstyń taralýyn boldyrmaý jáne juqtyrý qaýpin tómendetýdiń eń jaqsy tásili retinde adamdarǵa aýrý týraly jáne onyń qozdyrǵyshynyń taralý mehanızmderi týraly habardar etý ekenin aıtady.

«Sondyqtan ózińizdi jáne basqa adamdardy ınfektsııadan qorǵaý úshin saqtyq sharalaryna nazar aýdarýdy suraımyz. Máselen, azamattar qol jýý gıgıenasyn saqtaý, jıi sabyndap jýyp, zalalsyzdandyrý antıseptıkter qoldaný, túshkirý, jótelý gıgıenasyn saqtaý, adamdar kóp jınalatyn oryndarǵa barýdy meılinshe shekteý, áleýmettik araqashyqtyq saqtaý qajet. Sondaı-aq nashar jeldetiletin oryndarda betperde paıdalaný, ınfektsııaǵa qarsy vaktsınalaýdan ýaqytyly ótý, dárigerlerlerdiń nusqaýyn oryndaý, vırýs juqtyrǵan adamdarǵa kútim jasaǵanda sanıtarııalyq-epıdemıologııalyq sharalardy oryndaý artyq emes», - dedi Á.Ábdiqaıymova.

Eske salsaq, Qyzylorda oblysynda bıyl qyzylsha juqtyrýdyń 30 deregi anyqtaldy.