Qyzylorda oblysynda 24 páter urlyǵyna qatysy bar úsh adam ustaldy
QYZYLORDA. KAZINFORM - Qyzylorda oblysynda 24 páter urlyǵyna qatysy bar úsh adam qolǵa tústi.
Qyzylordalyq jedel ýákilder páter urlyǵymen aınalysqan adamdar tobyn Shıeli aýdanynda qylmys ústinde ustady. Ustalǵan úsh kúdiktiniń biri Abaı oblysynyń turǵyny bolsa, ekinshisi Aqmola oblysynan kelgen.
«Kúdiktiler úı ıeleriniń joqtyǵyn paıdalanǵan. Plastık terezelerdi kúshpen ashý arqyly úı ishine zańsyz kirip, aqsha, qundyz ton, tehnıka men altyn buıymdardy urlaǵan. Jedel-izdestirý is-sharalarynyń nátıjesinde jábirlenýshilerge tıesili altyn buıymdar men ózge de aıǵaq zattar zattaı dáleldeme retinde alyndy. Keltirilgen materıaldyq shyǵyn – 14 mln teńge. Kúdiktiler qamaýǵa alyndy. Olardyń oblys aýmaǵynda 24 páter urlyǵyn jasaǵany anyqtaldy. Ózge de uqsas faktilerge qatysy bar-joǵy tekserilýde. Tergeý jalǵasýda», - dep málim etti Qyzylorda oblystyq Polıtsııa departamentinen.
Eske salsaq, budan buryn Qyzylordada polıtsııa kıimimen zańsyz beınerolık túsirgen adam jazaǵa tartyldy.
