Qyzylorda oblysynda 2,3 mln tekshe metrden astam sýdy zańsyz paıdalaný faktileri anyqtaldy
ASTANA. KAZINFORM – Sý resýrstary jáne ırrıgatsııa mınıstri Nurjan Nurjigitov sýdyń «kóleńkeli naryǵyna» qarsy kúres máseleleri boıynsha apparat otyrysyn ótkizdi. Qyzylorda oblysynda alty sharýa qojalyǵynyń sýdy zańsyz paıdalanǵany anyqtaldy.
Bıyl vegetatsııalyq kezeń bastalǵaly beri óńirde ruqsatsyz alynǵan sýdyń kólemi 2,3 mln tekshe metrden asqan. Bul sýdyń barlyǵy kúrish alqaptaryn sýarýǵa paıdalanylǵan.
Ótken aptadaǵy apparat otyrysynda Sý resýrstary jáne ırrıgatsııa mınıstrliginiń mamandarynan tórt jumys toby qurylǵan bolatyn. Bul toptar Qazaqstannyń ońtústik oblystarynda sýdy zańsyz paıdalaný faktilerin tekserip qana qoımaı, sý únemdeý, retteý jáne aýyl sharýashylyǵy taýar óndirýshilerine sý jetkizý máseleleri boıynsha monıtorıng júrgizip jatyr.
Eske sala ketsek, buǵan deıin Aral-Syrdarııa basseındik ınspektsııasynyń mamandary Shardara aýdany prokýratýrasymen birlesip, Túrkistan oblysynda tirkelmegen 24 sorǵy qondyrǵysyn anyqtaǵan bolatyn.
— Sý únemdeý men sýarmaly sýdy durys úlestirýdi qamtamasyz etý maqsatynda bıyl «Qazsýshar» kásipornymen tıisti kelisimshartqa otyrǵan sharýa qojalyqtaryna ǵana sý beriledi. Jergilikti jerlerde tekserý mindetti túrde jalǵasady jáne sýdy zańsyz paıdalaný faktileriniń bári anyqtalyp, zań buzǵandar jaýapkershilikke tartylady. Jańa jyldan bastap sharýalarmen sý berý týraly kelisimsharttar tek elektrondy formatta jasalýy tıis. Barlyq kelisimshartty onlaın júıe arqyly tekserip, kelisilgen kólemdegi sýdyń berilip jatqanyn jáne kórsetilgen daqyldardyń rasymen ósirilip jatqanyn baqylap otyrý úshin osy máseleni pysyqtaý qajet, — dedi Sý resýrstary jáne ırrıgatsııa mınıstri Nurjan Nurjigitov.
Aıta ketelik Sý resýrstary mınıstrligi 1,3 mln adamdy aýyz sýmen qamtý úshin 2500 shaqyrym sý qubyryn salyp jatyr.