Qyzylorda oblysynda 22 myńnan astam adam JRVI juqtyrdy

Qyzylorda oblysy boıynsha 2023-2024 jylǵy jańa epıdmaýsymda 22 myńnan astam adam jiti respıratorly vırýsty ınfektsııa juqtyrdy, dep habarlaıdy Kazinform.

Qyzylorda oblysy sanıtarlyq-epıdemıologııalyq baqylaý departamentiniń málimetine súıensek, oblysta 2023-2024 jylǵy jańa epıdmaýsymda jiti respıratorly vırýsty ınfektsııanyń 22 170 jaǵdaıy tirkelgen. Olardyń 67 paıyzy - 14 jasqa deıingi balalar bolsa, onyń ishinde 10 paıyzy - 1 jasqa deıingi sábıler arasynda kezdesip otyr. 

Oblys boıynsha JRVI-men syrqattanýshylyqtyń aýyr aǵymyndaǵy 560 naýqastyń synamasy PTsR ádisimen tekserildi. Nátıjesinde zerthanalyq jolmen tumaý aýrýynyń 21 jaǵdaıy naqtylandy. Basym bóligi (71,4 paıyz) oblys ortalyǵynda kórinis berdi.

«Tumaý aýrýynyń aldyn alýdaǵy eń tıimdi ádis – vaktsınatsııa. Vırýsqa qarsy ımmýndaý naýqany jyl saıyn kúzde bastalady. Bul ekpe aýrýdyń aýyr túrlerin, aýrýhanaǵa túsý jaǵdaıyn, ólim-jitimdi tómendetedi. Tumaýdy juqtyryp alý qaýpin seıiltedi. Jalpy epıdemıologııalyq ahýaldy turaqty ustap turýǵa óz septigin tıgizedi. Vaktsınatsııa qaýipsiz. Odan keıin keıbir adamdarda ekpe jasaǵan jerde qyzarý jáne aýyrsyný, bas aýyrýy jáne bulshyq et aýyrýy, azǵana dene qyzýy, álsizdik jáne júrek aınýy sııaqty janama áserleri bolýy múmkin. Bul áserler tez joıylady. Tumaý aýrýynyń aldyn alý maqsatynda QR Úkimetiniń «Qarsy profılaktıkalyq egý júrgiziletin aýrýlardyń tizbesin, olardy júrgizý erejesin jáne halyqtyń josparly egilýge jatqyzylatyn toptaryn bekitý týraly» Qaýlysyna sáıkes 84 430 doza vaktsına satyp alyndy», - dep málim etti Qyzylorda oblysy sanıtarlyq-epıdemıologııalyq baqylaý departamenti basshysynyń orynbasary Álııa Ábdiqaıymova.

Vedomstvo málimetinshe, qazirge deıin oblysta 83 168 azamatqa tumaýǵa qarsy vaktsına salynǵan. Onyń ishinde balalar sany - 20 418, eresekter - 62 750 adam.

Eske salsaq, buǵan deıin Qyzylorda oblysynda alyp náreste dúnıege kelgenin jazǵan bolatynbyz.