Qyzylorda oblysynda 200 mln teńgege jýyq qarjy jymqyrǵan 9 adamǵa qatysty úkim shyqty

QYZYLORDA. KAZINFORM - Qyzylorda oblysy Jańaqorǵan aýdandyq soty 200 mln teńgeden astam bıýdjet qarajatyn jymqyrǵan 9 adamǵa qatysty úkim shyǵardy.

Bul boıynsha QR Qylmystyq kodeksiniń 189-baby 4-bóligi 2-tarmaǵymen is qozǵalǵan edi. Onda «Jańaqorǵan aýdanynyń bilim bólimi» KMM-niń basshysy, bólimniń bas esepshisi jáne 6 mektep esepshisine, 1 bas ekonomıstke qatysty qylmystyq is qaraldy.

«Sottalýshylar ózderiniń qyzmet babyn paıdalanyp, 2018 jyldyń qańtar-jeltoqsan aılary aralyǵynda bilim bóliminen 6 esepshi men 1 ekonomısttiń kómektesýi arqyly jalpy somasy 192097670 teńge memlekettik bıýdjet qarajatyn asa iri mólsherde birneshe ret jymqyrǵan. Sottalýshylar bólim basshysy I. men bas esepshi J. bilim bólimi esepshileriniń bankomat kartasyna aı saıyn eńbekaqy tólemi, eńbekke jaramsyzdyq pen issapar shyǵyny erekshelikteri boıynsha artyq jáne zańsyz qarajatty aýdaryp otyrǵan. Ony qolma-qol aqshaǵa aınaldyryp, ózderine alyp kelýdi tapsyrǵan. Osylaısha birlesip qylmys jasaýǵa aldyn-ala kelisimin alǵan. Óz kezeginde J. esepshiler men olardyń jaqyn týystaryna, mektepterdiń basqa da qyzmetkerleriniń banktik kart-shotyna zańsyz aqsha aýdarǵan. Atalǵan qarajat esepshiler arqyly ekinshi deńgeılik bank bankomattary arqyly qolma-qol aqshamen J.-ǵa tabys etilgen. Keıinnnen ol I.-ǵa jetkizilgen», - dep málim etti Jańaqorǵan aýdandyq sotynan.

Sot talqylaýy barysynda memlekettik aıyptaýshy bilim berý júıesinde jumys istemeıtin tulǵalardyń esepshotyna zańsyz aqsha aýdarylǵanyn dáleldedi.

Qylmystyq is boıynsha negizgi aıyptalýshylar 9 jáne 8 jylǵa bas bostandyǵynan aıyrylsa, qalǵan 7-i sybaılas býhgalterlik qyzmetpen aınalysý quqyǵynan aıyra otyryp, shartty túrde sottaldy.

Eske salsaq, budan buryn Qyzylorda oblysynda azamattardyń 35 mln teńgesin aldap alǵandar ustaldy.