Qyzylorda oblysynda 2 mlrd 456 mln teńgeden astam aıyppuldyń 81,9%-y óndirildi

QYZYLORDA. KAZINFORM – Qyzylorda oblysynda aıyppul óndirý baǵytynda úsh kúnge sozylǵan «Boryshker» jedel profılaktıkalyq is-sharasy qorytyndylandy.

Oblystyq polıtsııa departamentiniń habarlaýynsha, 16-18 shilde kúnderi jeke sot oryndaýshylardyń aralasýymen 116 ákimshilik qaýly boıynsha 3,5 mln teńgeden astam aıyppul memleket paıdasyna óndirildi. Sonymen qatar mobıldi toptar qurylyp, «Ekin Patrol» mobıldi kesheniniń kómegimen oblys ortalyǵynda 17 avtokólik ıesinen 1,5 mln teńgeden astam aıyppul óndirildi.

– Óńirde arnaıy qurylǵylar men mobıldi keshender arqyly 68 586 quqyqbuzýshylyq anyqtalyp, kinálilerge 952,5 mln teńge aıyppul salynsa, sonyń 86,2%-y óndirildi. Al jol qozǵalysyn baqylaý júıesi jalǵan memlekettik belgi taqqan, saqtandyrý sharty týraly málimeti bolmaǵan 7580 quqyqbuzýshylyqty anyqtaýǵa múmkindik berdi. Kólik ıelerine 239 mln teńgege jýyq aıyppul salyndy. Al oblys kóleminde quqyq buzýshylarǵa salynǵan 2 mlrd 456 mln teńgeden astam aıyppuldyń 81,9%-y óndirildi, - dedi departamenttiń ákimshilik polıtsııa basqarmasy bastyǵynyń orynbasary Nurken Baqtııarov. 

Osy oraıda tártip saqshylary oblys turǵyndaryn kólik basqarý barysynda jol erejelerin buzbaýǵa jáne ákimshilik quqyqbuzýshylyq boıynsha aıyppul salynǵan jaǵdaıda ony der kezinde qysqartylǵan negizde tóleýge shaqyrady.

Qyzylordada jyldamdyqty baqylaýǵa arnalǵan «kózge kórinbeıtin» kameralardyń paıda bolǵany týraly aqparatty oblystyq polıtsııa departamenti rastady.