Qyzylorda oblysynda 2 eldi mekenniń ákimderi saılandy

QYZYLORDA. KAZINFORM — Qyzylorda oblystyq saılaý komıssııasy 2 eldi mekende ótken ákim saılaýynyń qorytyndysyn jarııalady. 

Qarmaqshy aýdanynyń Tóretam kentinde 6354 adam saılaýshylar tizimine engizilse, sonyń 3229-y daýys berýge qatysqan. Esepten shyǵarý kýálikteri boıynsha daýys bergender joq. 34 adam daýys berý jaıynan tys jerde daýys berdi. Al 21 bıýlleten jaramsyz dep tanyldy.

— Kent ákimi bolýǵa kandıdat retinde 3 adam tirkelip, bıýlletenge engizildi. Daýys berý qorytyndysy boıynsha Nurlybek Saıymov Tóretam kentiniń ákimi bolyp saılandy. Ol 1986 jyly týǵan, Qarmaqshy aýdandyq qoǵamdyq damý bóliminiń basshysy. Ózin-ózi usynǵan, — delingen habarlamada.

Sondaı-aq 19 qazan kúni Aral aýdanynyń Jetes bı aýyldyq okrýgi ákiminiń saılaýy ótkizildi. Munda da 3 kandıdat daýysqa túsken. Saılaýshylar tizimine engen 334 adamnyń 284-i azamattyq tańdaýyn jasady. Daýys berý nátıjesinde Daırabaı Jalǵasbaev ózge úmitkerlerden basym tústi. 1965 jyly týǵan jeke kásipker, Aral aýdandyq máslıhatynyń depýtaty. Ony «AMANAT» partııasy usynǵan.

Atalǵan eldi mekenderde sońǵy ret ákim saılaýy 2021 jyly 4 qarashada ótken

Buǵan deıin biz Qyzylorda oblysy Qazaly aýdany ákiminiń saılaýy ótkenin habarlaǵan edik.