Qyzylorda oblysynda 18 myńnan astam adam qyzylshaǵa qarsy ekpe aldy

Qyzylorda oblysynda 6 qarashadan bastap 18 myńnan astam adam qyzylshaǵa qarsy vaktsına qabyldady, dep habarlaıdy Kazinform.

Oblysta qyzylsha aýrýyna shaldyqqandardyń 80 paıyzy - buryn aýrýǵa qarsy ekpe almaǵan azamattar. Búgingi tańda tıisti kontıngentter arasynda jappaı ımmýndaý sharalary júrgizilýde. 6 qarashadan bastaý alǵan ekpe alý naýqanynda 18 myńnan astam adam qyzylshaǵa qarsy vaktsına qabyldady. Immýndaý sharasy áli de jalǵasýda.

«Bul aýrý adamnan adamǵa aýa tamshylary arqyly jótelgende, túshkirgende, sóıleskende juǵady. Qysqa ýaqytta aýrýmen qarym-qatynasta bolǵan jaǵdaıda ekpe almaǵan adamdardyń qyzylshany juqtyrýy ábden múmkin. Ásirese 1-4 jas aralyǵyndaǵy balalar arasynda ol kóp kezdesedi. Sondyqtan balalar arasynda qyzylshaǵa qarsy vaktsınatsııalaý qarqyndy júrgizilýde», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Álııa Ábdiqaıymova.

Jyl basynan beri oblysta qyzylsha aýrýynyń 1 161 jaǵdaıy tirkelgen. Onyń ishinde 14 jasqa deıingi balalar arasynda 1017 jaǵdaı anyqtaldy.

«Qyzylshamen aýyrǵan adam eń aldymen oqshaýlanyp, qoǵamdyq ortada júrmeýi kerek. Aýrýdyń jasyryn kezeńi 9-11 kún, eger ımmýndalǵan jaǵdaıda jasyryn kezeńi 15-21 kúnge sozylýy múmkin. Aýrýdyń alǵashqy belgileri: álsizdik, tábettiń bolmaýy, dene qyzýynyń kóterilýi, jóteldiń paıda bolýy. Odan keıin jumsaq jáne qatqyl tańdaıda bórtpeler paıda bolady. Eger adam dál osyndaı belgilerdi ózinen baıqasa dereý medıtsınalyq kómekke júginýi kerek. Qyzylsha aýrýynyń aldyn alýdyń negizgi joly – ekpe alý. Osy arqyly ǵana aýrýdyń órshýin toqtatýǵa múmkindik bolady», - dedi oblystyq densaýlyq saqtaý basqarmasy basshysynyń orynbasary Maıa Mırzanova.

Eske salsaq, budan buryn Qyzylorda oblysynda 22 myńnan astam adam JRVI juqtyrdy.