Qyzylorda oblysynda 177 jer ýchaskesi memleket menshigine qaıtaryldy

QYZYLORDA. KAZINFORM - Qyzylorda oblysynda 177 jer ýchaskesi memleket menshigine qaıtaryldy. Olardyń birrqatary maqsatty paıdalanylmaǵan bolsa, qalǵanynda tıisti zańnamanyń buzylǵany anyqtalyp, tirkelgen.

Oblys kóleminde byltyr maqsatty paıdalanylmaǵan nemese oǵan qatysty zańnamany buzylýy tirkelgen 177 jer ýchaskesi memleket menshigine qaıtaryldy. Olardyń jalpy aýmaǵy 225,4 myń gektar. Onyń ishinde egistigi 1,4 myń gektardy shamalasa, jaıylymy – 223,9 myń gektar.

«Byltyr aýyl sharýashylyǵy aınalymyna 76,1 myń gektar engizildi. Bıyl 70 myń gektar paıdalanylmaı jatqan aýyl sharýashylyǵy maqsatyndaǵy jerlerdi memleketke qaıtarý kózdelip otyr. Jyl basynan beri kólemi 11 237 gektar 23 jer ýchaskesi memleket menshigine qaıtaryldy. Aýyl sharýashylyǵy aınalymyna 36,9 myń ga kólemde engizildi», - dep málim etti Qyzylorda oblystyq Aýyl sharýashylyǵy jáne jer qatynastary basqarmasy.

Vedomstvo málimetinshe, oblys boıynsha ózindik qosalqy sharýashylyqtardaǵy 1538 myń bas shartty mal basyna 1966,5 myń gektar jaıylym alqaby qajet. Óńirdegi 146 aýyldyq okrýgtiń 97 okrýgi jaıylymmen tolyq qamtamasyz etilgen.