Qyzylorda oblysynda 15 myń gektardan astam egistik jer qalpyna keltirildi
QYZYLORDA. KAZINFORM – Qyzylorda oblysynyń Jalaǵash aýdanynda Syrdarııa ózeni basseınindegi ırrıgatsııalyq jáne drenajdyq júıelerdi qaıta jańǵyrtý jumystary aıaqtaldy.
Sý resýrstary jáne ırrıgatsııa mınıstrliginiń málimetinshe, barlyǵy 1362,2 shaqyrym kanal qaıta jańǵyrtylyp, 14 617 shaǵyn gıdrotehnıkalyq nysan aýystyrylyp, jańadan salyndy. Sondaı-aq 327,86 shaqyrym kollektor men 151 baqylaý uńǵymasy qalpyna keltirildi. Osy jumystardyń nátıjesinde jalpy kólemi 15,1 myń gektar aýyl sharýashylyǵy alqabyn sýmen jabdyqtaý jáne melıoratıvtik jaǵdaıy jaqsaryp, sýarmaly jerler tolyq ıgerildi.
Joba sý shyǵynyn 30%-ǵa deıin azaıtý arqyly jylyna shamamen 95 mln tekshe metr sýdy únemdeýge múmkindik beredi. Jergilikti sharýa qojalyqtary jumys nátıjelerine oń baǵa berip otyr.
– Kanaldardy tazartý, shlıýzder ornatý jáne basqa da jumystardyń arqasynda sý jetkizý jaǵdaıy 35-40%-ǵa jaqsardy. Bul júıe dıqandarǵa sý tapshylyǵy jaǵdaıynda da jumys isteýge kómektesedi. Jalpy nátıjeler óte jaqsy, – dedi jergilikti sharýa qojalyǵynyń agronomy Sultanbek Úsenov.
– Bul jumystar Dúnıejúzilik bankpen birlesip júzege asyrylyp jatqan Irrıgatsııalyq jáne drenajdyq júıelerdi jetildirý jobasynyń ekinshi kezeńi aıasynda atqaryldy. Osyǵan uqsas jobalar Almaty, Jambyl jáne Túrkistan oblystarynda da júrgizilip jatyr. Osynyń arqasynda 105 myń gektardan astam jerdiń sýarmaly jaǵdaıy jaqsarady. Búginde bul jobalardyń 86%-y aıaqtaldy. Qazirdiń ózinde 79,15 myń gektar egistikke sý jetkizý jaqsaryp, jylyna 201,8 mln tekshe metr sý únemdeýge jaǵdaı jasaldy, – dedi Sý resýrstary jáne ırrıgatsııa mınıstri Nurjan Nurjigitov.
Qyzylorda oblysynda sý únemdeý úshin 60 myń gektarǵa jýyq kúrish alqaby lazermen tegistelgenin jazǵan bolatynbyz.