Qyzylorda oblysynda 143 adam gonkong tumaýymen aýyrǵan
QYZYLORDA. KAZINFORM – 2025-2026 jylǵy jańa epıdemıologııalyq maýsym bastalǵaly beri Qyzylorda oblysynda jedel respıratorly vırýsty ınfektsııa juqtyrýdyń 38411 jaǵdaıy esepke alyndy. Bul týraly oblystyq Sanıtarııalyq-epıdemıologııalyq baqylaý departamentinen habarlady.
Aýyrǵandardyń 70%-y – 14 jasqa deıingi balalar. Naýqastardyń 4%-y aýrýhanaǵa jatqyzylǵan.
- 487 naýqastyń synamasy PTsR ádisimen tekserilip, nátıjesinde zerthanalyq jolmen A tıpti (H3N2) 143 tumaý aýrýy naqtylandy. Respýblıka aýmaǵynda, sondaı-aq oblysta tirkelgen A tıpti (H3N2) Gonkong tumaýy jańa vırýs emes. Maýsymdyq tumaýdyń burynnan belgili túri jáne jyl saıyn kezdesedi. Degenmen, ol halyqtyń álsiz toptary úshin qaýipti. Adamdar arasynda tez taralyp, aýyr túrde ótedi, - dedi departament basshysynyń mindetin atqarýshy Erlan Uzaqbaev.
Synama zertteý nátıjesinde JRVI-diń tumaý sanatyna jatpaıtyn adenovırýs, rınovırýs sııaqty 8 túri anyqtaldy. Dárigerler tumaý órship turǵan ýaqytta halyqty múmkindiginshe halyq kóp jınalatyn oryndarǵa barmaýǵa, jeldetilýi tómen oryndarǵa barǵanda betperde taǵýǵa, aýyrǵan adamdarmen qarym-qatynasty shekteýdi, sondaı-aq jeke bas gıgıenasyn saqtap, antıseptıkter paıdalanýǵa keńes berdi. Respıratorlyq aýrýdyń belgileri baıqalǵan boıda ózin-ózi emdeýmen aınalyspaı, tez arada dárigerge barýǵa shaqyrdy.
- Aýrýdyń aldyn alýdyń basty joly – vaktsınatsııa. Osy epıdmaýsym úshin 85 myń dozadan astam vaktsına satyp alyndy. Búgingi kúni 84 myńǵa jýyq adamǵa ekpe salyndy, sonyń 23,5 myńǵa jýyǵy – balalar. Jumys berýshiler 2 myń doza vaktsına satyp alyp, 1,5 myńnan astam adam ekpe qabyldady, - dedi Erlan Uzaqbaev.
Osylaısha oblys turǵyndarynyń 9,9%-y tumaýǵa qarsy vaktsına qabyldady. Dúnıejúzilik densaýlyq saqtaý uıymy jalpy turǵynnyń 10%-y ekpe alǵan jaǵdaıda ujymdyq ımmýnıtet qalyptasatynyn alǵa tartyp otyr.
Aıta keteıik, JRVI-diń kóbeıýine baılanysty oblysta jedel járdem kóliginiń keshigý jaǵdaılary jıilegenin jazǵanbyz.