Qyzylorda oblysynda 14 jyl burynǵy jasóspirim ólimine qatysty qylmys ashyldy
QYZYLORDA. KAZINFORM – Іshki ister mınıstrligi Qyzylorda oblysynda 2012 jyly bolǵan jasóspirim ólimine qatysty qylmystyń ashylǵanyn málimdedi.
Qaıǵyly oqıǵa 2012 jyldyń qazan aıynda Qarmaqshy aýdanynyń Josaly kentinde bolǵan.
Toptyq tóbeles kezinde jasóspirim pyshaq jaraqatyn alyp, aýdandyq aýrýhanaǵa jetkizilgenimen, esin jımastan kóz jumǵan.
Oqıǵadan keıin tóbeleske qatysqan adamdar anyqtalyp, tekserilgen. Alaıda tikeleı dálelder men kýágerlerdiń bolmaýyna baılanysty qylmys uzaq jyldar boıy ashylmaı kelgen.
ІІM krımınaldyq polıtsııa departamenti bastyǵynyń orynbasary Rýslan Nazarov bıyl tergeý-jedel tobynyń muqııat jumysynyń nátıjesinde basty kýáger anyqtalǵanyn aıtty.
– Jedel is-sharalar barysynda polıtseıler kúdiktige shyqty. Ol sol tóbeleske qatysqan azamat bolyp shyqty jáne basqa aýyr qylmys jasaǵany úshin jazasyn ótep jatqan. Jınalǵan dálelderdiń arqasynda ol óz kinásin moıyndady, – dedi Rýslan Nazarov.
Kúdikti qajetti tergeý áreketterin júrgizý úshin Qyzylorda qalasyndaǵy tergeý ızolıatoryna jetkizilgen.
Tergeý barysynda qylmysqa jastar arasyndaǵy janjal men ózara arazdyq sebep bolǵany anyqtaldy.
Qazirgi ýaqytta kúdikti qamaýda otyr.
Qylmystyq is sotqa joldanǵan.
Іshki ister mınıstrligi ókilderi ótken jyldardaǵy qylmystardy ashý jumystary jalǵasatynyn jáne kinálilerdiń zań aldynda mindetti túrde jaýap beretinin atap ótti.
Aıta keteıik, Qyzylordada medıtsına kolledjiniń stýdenti jataqhanada kisi qolynan qaza tapty.
