Qyzylorda oblysynda 120 jyldyq tarıhy bar Qazaly temirjol vokzaly jańartylyp jatyr
QYZYLORDA. KAZINFORM – Memleket basshysynyń bastamasymen júzege asyrylyp jatqan «Taza Qazaqstan» ekologııalyq jobasy aıasynda Qyzylorda oblysynyń Qazaly aýdanynda ekologııalyq jaǵdaıdy jaqsartý, halyqqa jaıly ómir súrý ortasyn qalyptastyrý jáne zamanaýı demalys ınfraqurylymyn damytý baǵytynda aýqymdy jumystar júrgizilip jatyr.
Qazaly mádenı-demalys kesheni – jańa tynys, jańa serpin
Jýyrda ashylǵan Qazaly mádenı-demalys kesheni aýdan turǵyndary men qonaqtarynyń súıikti ornyna aınaldy. Keshen eki negizgi bólikten turady: Jeńis saıabaǵy jáne otbasylyq demalys saıabaǵy. Jeńis saıabaǵy Jeńistiń 80 jyldyq mereıtoıyna oraı ashylsa, otbasylyq saıabaqtyń ashylýy 5 maýsym – Dúnıejúzilik qorshaǵan ortany qorǵaý kúnine tuspa-tus keldi.
Keshen aýmaǵynda «Qurmetti azamattar» taqtasy, «Han taǵy», rotonda, pergola, fontan, shahmat jáne tennıs ústelderi, jaryqtandyrý júıeleri, velosıped jolaqtary, «Dańq», «Taǵzym», «Kıeli qazaq eli», «Ǵashyqtar» alleıalary, sporttyq alańdar jáne balalar oıyn alańdary ornatylǵan.
Sondaı-aq jeke kásipkerlerdiń qoldaýymen meıramhanalar, tamaqtaný oryndary, akvapark, attraktsıondar, kartıng, batýt syndy demalys jáne oıyn-saýyq nysandary da boı kóterdi.
Keshen aýmaǵyn kógaldandyrý aıasynda 20 myńǵa jýyq aǵash kóshetteri – qaraǵaı, aqqaıyń, týıa, katalpa, úıeńki jáne jemis aǵashtary otyrǵyzyldy.
Abattandyrý – aýdan kórkin arttyrýdyń basty baǵyty
Aýdan ortalyǵynda halyqqa qolaıly jaǵdaı jasaý maqsatynda Ortalyq alań, «Rýhanııat» ortalyǵy aldyndaǵy skver syndy nysandar tolyq abattandyryldy. Jańa fontan, brýschatkalar, balalar jáne trenajer alańdary ornatylyp, aýdannyń sáýlettik kelbeti jańa deńgeıge kóterildi.
Qazaly temirjol vokzaly jańaryp jatyr
Bıyl sáýir aıynda tarıhı mańyzy bar, 120 jyldyq Qazaly temirjol vokzalyna «Qazaqstan Temir Joly» UK AQ qarjylandyrýymen kúrdeli jóndeý jumystary bastaldy. Joba aıasynda ǵımarat irgetasy men qabyrǵalary nyǵaıtylyp, shatyr, esik-terezeler tolyq jańartylyp, jolaýshylarǵa arnalǵan kútý zaldary zamanaýı standarttarǵa saı jabdyqtalady.
Múmkindigi shekteýli jandarǵa arnalǵan qoljetimdilik elementteri men qaýipsizdik júıeleri ornatylady. Sonymen qatar vokzal mańyn kógaldandyrý jáne brýschatka tóseý jumystary da qarastyrylǵan. Qazirgi tańda jóndeý jumystarynyń basym bóligi aıaqtalýǵa jaqyn.
Budan bólek, «Taza Qazaqstan» respýblıkalyq ekologııalyq jobasy aıasynda óńirdiń barlyq eldi mekenderinde sanıtarlyq tazartý, abattandyrý jáne kórkeıtý-kógaldandyrý jumystary júrgizilip jatyr.
Búgingi kúnge tazalyq sharalaryna barlyǵy 190 myńnan asa (191 663) eriktiler, qoǵam qaıratkerleri, bıýdjet salasy men kásiporyn qyzmetkerleri qatysty. Atalǵan jumys qorytyndysy boıynsha 8 myń tonna (8 125) astam qoqys qaldyqtary shyǵarylyp, eldi mekenderdegi 471 skverler men parkter, 221 tarıhı-mádenı eskertkishter, 998 áleýmettik nysandar (mektepter, bala-baqshalar, sport, densaýlyq saqtaý jáne t.b.), 2 820 ónerkásip jáne bıznes nysandary, 35 sý obektileri (ózender, kólder, jasandy sý aıdyndary, sýburqaqtar, aryqtar jáne t.b), men 23 124 kóshelerdiń boıy (4 025 kóp qabatty úıler men 19 099 jer úılerdiń aýlalary) tazartyldy. Oǵan 540-tan asa tehnıka (545) jumyldyryldy.
Jyl basynan oblys boıynsha 240 700 dana óńirdiń klımatyna sáıkes jersinetin qaraǵash, terek jáne syrtalynyń kóshetteri egildi.