Qyzylorda oblysynda 113 myńnan astam adam MÁMS júıesinde saqtandyrylmaǵan
QYZYLORDA. KAZINFORM - 5 maýsymdaǵy jaǵdaı boıynsha Qyzylorda oblysynda bastapqy medıtsınalyq-sanıtarııalyq kómek uıymdaryna 846 360 adam tirkelgen.
Áleýmettik medıtsınalyq saqtandyrý qorynyń Qyzylorda oblysy boıynsha fılıaly habarlaǵandaı, onyń 732 myńnan kóbi nemese 86,5%-y saqtandyrylǵan. Al saqtandyrylmaǵan adamdar sany 113,5 myńnan asady, bul – 13,9%.
- Azamattardyń saqtandyrylmaýynyń negizgi sebebi – mindetti áleýmettik medıtsınalyq saqtandyrý (MÁMS) júıesine jarna men aýdarymnyń ýaqytyly tólenbeýi. Jaldamaly qyzmetkerler úshin tólemdi jumys berýshi aýdarady, al basqa sanattaǵy azamattar jarnany ózderi tóleıdi. Saqtandyrý mártebesin alý úshin burynǵy qaryzdy tolyq jabý mindetti emes. Sońǵy 12 aıǵa jarna tóleý jetkilikti. Sonymen qatar 5 jyl úzdiksiz jarna tólegen azamattar úshin tólem toqtaǵan jaǵdaıda 6 aıǵa deıin mártebe saqtalady, - dedi fılıal dırektory Jaqsylyq Ábdýsámetov.
Jyl basynan beri jumyssyz jáne osal toptaǵy (D jáne E sanatty) azamattar úshin saqtandyrý jarnasy jergilikti bıýdjet esebinen tólenip keledi. Bul júıe elimizde shamamen 1 mıllıonnan astam adamǵa saqtandyrylǵan mártebesin alýǵa múmkindik beredi. Qyzylorda oblysy boıynsha bul kórsetkish 40 myń adam shamasynda. Bul jumyssyzdar men osal toptardyń MÁMS mártebesin alýyna múmkindik beredi.
Bıyl óńir turǵyndaryna medıtsınalyq kómek kórsetý úshin 125 jetkizýshige 135,9 mlrd teńge bólindi. Bul qarajat halyqty tegin medıtsınalyq kómektiń kepildik berilgen kólemi jáne MÁMS júıesi aıasyndaǵy medıtsınalyq qyzmetpen qamtamasyz etýge baǵyttalǵan.
- Medıtsınalyq kómektiń sapasyn arttyrýǵa júıedegi jetkizýshiler sanynyń kóbeıýi jáne olardyń arasyndaǵy básekelestik te oń áserin tıgizedi. Búginde óńir boıynsha qormen kelisimshart jasasqan 125 medıtsınalyq uıymnyń 93-i nemese 74,4%-y – jekemenshik uıymdar. Jeke sektordyń qatysýy qyzmet kórsetý sapasyn jaqsartyp, memlekettik medıtsınalyq uıymdardy da ózgerister engizýge yntalandyrady ári medıtsınalyq qyzmet kórsetýge qoıylatyn talaptardy kúsheıtedi, - dedi fılıal basshysy.
Buǵan deıin habarlaǵanymyzdaı, bıyl Almatyda buryn saqtandyrylmaǵan 99 myńnan astam turǵyn mindetti áleýmettik medıtsınalyq saqtandyrý arqyly kórsetiletin qyzmetterge qol jetkizdi.
