Qyzylorda oblysynda 100-den astam kólik jol boıynda qalyp qoıǵan
Qyzylorda oblysynda patrýldik polıtseıler úsh kún ishinde jol boıynda qalǵan 100-den astam avtokólikke kómek kórsetti. Olardyń qatarynda Reseıden Shymkent qalasyna bet alǵan avtoýs ishinde qalyp qoıǵan ózbekstandyq 62 azamat bar, dep habarlaıdy Kazinform.
Qyzylorda oblysy aýmaǵynda qolaısyz aýa raıy saqtalyp tur.
Osyǵan baılanysty jáne jol qaýipsizdigin qamtamasyz etý maqsatynda patrýldik polıtsııa qyzmetkerleri táýlik boıy kúsheıtilgen rejımde jumys istep jatyr.
Oqys oqıǵalardyń aldyn alý baǵytynda nátıjeli jumys jasaldy.
«Halyqaralyq „Samara-Shymkent“ tasjolynyń Qyzylorda oblysy Qazaly aýdanynyń tusyndaǵy 1476-790 shaqyrymynda Reseıdiń Perm qalasynan Shymkentke baǵyt alǵan „Van Hool“ markaly avtobýsynyń janarmaıy qatyp, úskirik aıazda jol boıynda qalǵan. Polıtsııa qyzmetkerleri avtobýstaǵy Ózbekstan 62 azamatyna jedel kómek kórsetip, avtokólik qaıta jolǵa shyqty. Patrýldik polıtseıler úsh kún ishinde jol boıynda qalǵan 100-den astam avtokólikke kómekke keldi. Aýa raıynyń turaqsyzdyǵyna baılanysty jol qozǵalysy qatysýshylaryna óte muqııat bolýyn jáne shuǵyl qyzmetterdiń eskertý habarlamasyna nazar aýdarýyn suraımyz», — dep málim etti Qyzylorda oblysy polıtsııa departamentinen.
Polıtsııa qyzmetkerleri kóktaıǵaq kezinde júrgizýshilerge jyldamdyq rejımin saqtap, kúrdeli manevr jasamaı, kólik quraldary arasyndaǵy qashyqtyqty saqtaý qajet kendigin eskertedi.
«Kóktaıǵaq kúnderi qaýip jaıaý júrginshilerge de, júrgizýshilerge de tónedi. Sol sebepti jolda abaı bolyp, qarapaıym qaýipsizdik erejelerin saqtaǵan jón», — deıdi mamandar.
Eske salsaq, Qyzylorda oblysynda kúnniń sýytýyna baılanysty 13-15 jeltoqsan aralyǵynda oqýshylar men stýdentterge sabaq onlaın ótkiziledi.
