Qyzylorda oblysynda 10 mektepte «Sý klýbtary» ashyldy
ASTANA. KAZINFORM — Qyzylorda oblysynda oqýshylarǵa sýdy únemdeýdi úıretýge baǵyttalǵan bilim berý baǵdarlamasy iske qosyldy. Pılottyq joba aıasynda 10 mektepte sý klýbtary ashylǵan. Oǵan 12 myńnan astam oqýshy men 800-den astam ustaz qatysyp júr.
Jańa joba jaıly Jibek Joly telearnasynyń «Búgin.Live» baǵdarlamasynda QR Sý resýrstary jáne ırrıgatsııa mınıstrligi aqparattyq-taldaý ortalyǵynyń joba jetekshisi Ermahan Polat málimdedi.
— Jobanyń maqsaty — jastar arasynda sý resýrstaryn uqypty paıdalaný jáne sýdy únemdeý mádenıetin qalyptastyrý. Óńirdegi 10 mektepte baǵdarlama óz jumysyn bastady. Sonymen qatar 45 magnıttik mektep te jobaǵa qatysady. Bul bilim ordalarynda arnaıy «Sý klýbtary» quryldy. Klýb quramyna joǵary synyp oqýshylary biriktirilgen. Olar bastaýysh synyp oqýshylaryna sý únemdeýdiń mańyzy týraly túsindirip, ekologııalyq jaýapkershilikke baýlıdy, — deıdi maman.
Spıker sózinshe, joba aıasynda Oqý-aǵartý mınıstrligimen birlese «Adal azamat — birtutastyq» baǵdarlamasy negizinde is-sharalar jospary ázirlengen. Ár shara balalardyń ekologııalyq mádenıetin qalyptastyrýǵa baǵyttalǵan.
— Oqýshylar arasynda sýret baıqaýlary, plogıng aktsııalary, debattar uıymdastyrylady. Sondaı-aq «Tamshynyń shytyrman oqıǵalary» atty ertegiler men eko-saǵattar ótkiziledi. Ustazdardyń qatysýymen onlaın-konferentsııalar da uıymdastyrylady. Bul sharalar arqyly oqýshylar sýdy únemdeýge óz úlesin qosýǵa múmkindik alady. Barlyq aqparat pen jańalyqtar Tamshy.kz saıtynda jarııalanady. Sonymen qatar oqýshylar arasyndaǵy baıqaýlar da osy platforma arqyly ótkiziledi, — deıdi ol.
Osy tusta Ermahan Polat pılottyq joba úshin Qyzylorda oblysy kezdeısoq tańdalmaǵanyn da atap ótti.
— Jobany qarjylandyryp otyrǵan Frantsýz damý agenttigi Qazaqstanda jerinde taldaý júrgizgen. Nátıjesinde sý máselesi ózekti aımaqtardy anyqtap, Qyzylorda óńirin tańdaǵan. Bastama Qazaqstan men Ózbekstan oqýshylaryn Aral teńizi basseınindegi sý resýrstaryna uqypty qaraý mádenıetine tárbıeleýdi kózdeıdi. Eki elde de qatar júzege asyrylyp jatyr. Arnaıy zertteý jumystary barysynda óńirdegi sý tapshylyǵy men ony tıimdi paıdalaný máselesi naqty aıqyndalǵan, — deıdi Ermahan Polat.
Mamanyń aıtýynsha, jyl sońyna deıin jobany ózge óńirlerde keńeıtý josparlanyp otyr. Atap aıtqanda, Qostanaı, Qaraǵandy jáne ońtústik oblystarda iske asyrý kózdelgen. Osylaısha bastama kezeń-kezeńimen respýblıka kóleminde taratylady.
Eske sala keteıik, Senatta jerasty sý resýrstaryn tıimdi paıdalaný máselesi kóterildi.