Qyzylorda oblysyna kelgen týrıster sany 25,4% kóbeıdi
QYZYLORDA. KAZINFORM — Ótken jyly Qyzylorda oblysyna 212 myńnan astam týrıst kelgen.
Oblys ákiminiń baspasóz qyzmeti taratqan málimetke súıensek, bul kórsetkish aldyńǵy jylǵydan 25,4%-ǵa artyq. Qyzmet kórsetý kólemi 3 mlrd 288 mln teńgege, ıaǵnı 42,8%-ǵa ósti.
— Týrıster men jergilikti turǵyndarǵa qolaıly jaǵdaı jasaý baǵytynda aýqymdy jumys júrgizilip jatyr. Qaıta jańǵyrtylǵan temirjol vokzaly men Qorqyt ata áýejaıyna úsh tilde aqparat beretin vırtýaldy kartalar men QR kodtar ornatyldy. Sondaı-aq zamanaýı mýzeı ashylyp, demalys parkteri jańartyldy. Qaýipsizdikti qamtamasyz etý úshin halyq kóp shoǵyrlanatyn oryndarǵa 102 jáne SOS dabyl batyrmalary qoıyldy. Týrıstik ınfraqurylymdy damytýda bes, úsh juldyzdy qonaqúıler salynyp, aýdandardaǵy temirjol vokzaldary jańǵyrtylyp jatyr. Týrıstendirý kartasyna engen 13 nysanda naqty is-sharalar qolǵa alyndy. Jergilikti bıýdjet esebinen Josaly kentinen Maral baba kesenesine deıingi 6,5 shaqyrym jol jóndeldi. Baıqońyrdaǵy zymyran ushyrylymyn kórýshilerge arnalǵan 400 oryndyq zamanaýı kıiz úı formatyndaǵy baqylaý pýnkti ashyldy, — delingen habarlamada.
Ortalyq Azııadaǵy alǵashqy GeoparkAral jobasy Qyzylorda oblysynyń Aral aýdanynda paıda boldy. Ony qurýdaǵy maqsat — tabıǵı jáne geologııalyq murany saqtaý, turaqty damýdy qamtamasyz etý, geotýrızmdi damytý.
Eske salaıyq, ótken jyldyń qorytyndysy boıynsha Qazaqstannyń týrızm salasy negizgi kórsetkishter turaqty ósim kórsetti.
