Qyzylorda oblysy jyl saıyn 2 mlrd tekshe metr sý joǵaltady - senator

Parlament depýtaty Qyzylorda oblysynda sý tapshylyǵy asa ótkir seziletinin atap ótti. Sebebi óńirdegi sý resýrstarynyń 90 paıyzdan astamy elden tys jerlerden keledi. 
Onyń aıtýynsha, búginde sýarý júıeleri men Syrdarııa ózeniniń arnasy apattyq jaǵdaıǵa jaqyn, bul aýyl sharýashylyǵy men óńir turǵyndary úshin eleýli qaýip tóndirýde.

- Kanaldardyń barlyǵy 1960-1970 jyldary paıdalanýǵa berilgendikten, búginde tehnıkalyq jaǵdaıy óte tómen. Sonyń saldarynan sýarý júıesiniń paıdaly áser koeffıtsıenti nebári 60-65 paıyzdan aspaıdy. Topyraq qurylymdy kanaldardan jyl saıyn shamamen 2 mlrd tekshe metr sý joǵalady, bul degenimiz respýblıka boıynsha jyl saıynǵy sý shyǵynynyń teń jartysy», – dedi Rýslan Rústemov Senattyń jalpy otyrysynda.

Sonymen qatar senator quny 16,6 mlrd teńgeni quraıtyn 15 kanaldy betondaý boıynsha jobalyq-smetalyq qujattama daıyndalǵanyn, sondaı-aq taǵy 33 kanal boıynsha jobalar ázirlenip jatqanyn jetkizdi. Bul qadamdar sý shyǵynyn azaıtyp, únemdelgen sýdy Aral teńizine baǵyttaýǵa múmkindik beredi.

Sondaı-aq depýtat uzyndyǵy 12,5 myń shaqyrymdy quraıtyn sharýashylyqishilik kanaldardyń áli kúnge deıin respýblıkalyq menshikke berilmegen máselesin kóterdi.

- Birinshi kezekte kommýnaldyq menshiktegi 15 kanaldy betondaýǵa arnalǵan jobalyq-smetalyq qujattamany respýblıkalyq bıýdjet nemese halyqaralyq qarjy uıymdary esebinen qarjylandyrýdy qarastyrýǵa, jyl saıynǵy 2 mlrd tekshe metr sý shyǵynyn boldyrmaý maqsatynda qosymsha 33 kanalǵa ázirlenip jatqan qujattardy memlekettik bıýdjet josparyna engizýge, 12,5 myń shaqyrymdyq ishki sharýashylyq kanaldaryn respýblıkalyq menshikke qabyldap, 2018-2020 jyldary tıisti mınıstrlikke usynylǵan qujattama boıynsha máseleni túpkilikti sheshýdi jedeldetýge, atalǵan jobalardy qarjylandyrýdy qamtamasyz etýge yqpal jasaýdy suraımyn», – dedi senator.

Budan buryn habarlanǵandaı, elimizdiń ońtústigindegi 103 ırrıgatsııalyq kanaldy avtomattandyrý bastaldy.