Qyzylorda oblysy tasqyn sýdan keler qaýipke qanshalyqty daıyn
QYZYLORDA. KAZINFORM — Qyzylorda oblysy aýmaǵynan ótetin Syrdarııa ózeniniń oń jáne sol jaq betinde uzyndyǵy 625,12 shaqyrym qorǵanys bógeti bar.
Qazirgi kezde oblysqa 101 tekshe metr sý kelip jatyr. Oblystyq tótenshe jaǵdaılar departamenti sýdan tónetin qaýiptiń betin qaıtarýǵa daıyn.
— Tasqyn sý kelerde vızýaldy zertteýdi qajet etetin 37 gıdrotehnıkalyq qurylys ornalasqan. 31 yqtımal sý basý aımaǵy bar. Olar 83,5 myńnan astam adamdy, 16,5 myńnan astam turǵyn úı men 36 eldi mekendi qamtıdy. Sý tasqynyna qarsy materıaldyq-tehnıkalyq qor — 117,9 tonna janar-jaǵarmaı, 139 902 qap, 17 710 baý qamys, 5 865 pashyn, 239 tonna qoıtas jáne 2381 qarabýra ınertti materıal jınaqtaldy. 31 eldi mekende jaǵdaı kúrdelengen kezde sý tasqynynyń qaýpin joıýǵa 135 mekeme, 410 tehnıka jáne 1234 adam bekitilgen. Bizdiń tarapymyzdan 123 adam, 23 tehnıka, 6 júzý quraly, 33 motopompa jáne 2 tikushaq daıyn, — dedi departamenttiń basqarma bastyǵy A.Orazbekov.
Sý tasqyny kezeńinde halyq 61 jınaý-evakýatsııalaý, 71 qabyldaý-evakýatsııalaý pýnktine kóshiriledi. Muz jarý jumysymen jylda mamandandyrylǵan uıym aınalysady.
— 2025-2026 jyldarǵa arnalǵan jazǵy-kúzgi mezgilderde sý tasqynynyń aldyn alý baǵytynda atqarylatyn is-sharalardyń ınjenerlik jospary bekitildi. Byltyr josparǵa engen 9 nysanda jumys atqaryldy. Jergilikti atqarýshy organ men sý sharýashylyǵy mekemesiniń mamandarynan qurylǵan jumysshy top gıdrotehnıkalyq qurylǵylardy zerttedi. Mekeme basshylaryna tıisti tapsyrmalar berildi. Tótenshe jaǵdaıdyń aldyn alý baǵytynda jergilikti atqarýshy organdarmen birlesken is-sharalar jalǵasyp jatyr, — dedi departament ókili.
Buǵan deıin biz Batys Qazaqstan oblysyndaǵy kóktemgi sý tasqynyna baılanysty daıyndyq jumystary jóninde jazǵanbyz.