Qyzylorda oblysy Kásipkerlik jáne ónerkásip basqarmasynyń basshysy sottaldy

QYZYLORDA. KAZINFORM — Qyzylorda qalalyq soty oblystyq Kásipkerlik jáne ónerkásip basqarmasynyń basshysy D.Ábsattarovqa qatysty úkim shyǵardy.

Sybaılas jemqorlyqqa qarsy is-qımyl agenttiginiń málimetinshe, ol bıznes ókilderine ulynyń oqýyna 1,4 mln teńge somasynda aqy tóleý jáne quny 6,8 mln teńge dızel otynyn berý qajettigi týraly zańsyz nusqaýlar berý arqyly laýazymdyq ókilettikterin asyra paıdalanǵany úshin kináli dep tanyldy.

Budan basqa, sheneýnik óńir kásiporyndarynyń suıytylǵan gazdyń tıisti kólemin alý quqyǵyn shekteý arqyly bıznes sýbektilerine 26,9 mln teńge somasynda zalal keltire otyra zańdy kásipkerlik qyzmetpen aınalysýǵa kedergi jasaǵany úshin sottaldy.

Sot úkimimen Ábsattarovqa memlekettik qyzmette jáne kvazımemlekettik sektor sýbektilerinde laýazymdardy atqarý quqyǵynan ómir boıyna aıyra otyryp, 9 aı bas bostandyǵynan aıyrý túrindegi jaza taǵaıyndaldy. Sondaı-aq memlekettik nagrada – «Eren eńbegi úshin» medalinen aıyrý týraly usynys engizildi.

Úkim zańdy kúshine endi.

Oblystyq biryńǵaı konkýrstyq komıssııasynyń sheshimi jáne oblys ákiminiń ókimimen Qyzylorda oblysynyń Kásipkerlik jáne ónerkásip basqarmasynyń basshysy qyzmetine Dinmuhamed Bolatuly Ábsattarov taǵaıyndalǵanyn jazǵan bolatynbyz.