Qyzylorda oblysy halqynyń 16,4%-y MÁMS aıasynda saqtandyrylmaǵan
QYZYLORDA. KAZINFORM – Qyzylorda oblysynda mindetti áleýmettik saqtandyrý júıesi aıasynda 684 myńnan astam adam, ıaǵnı aımaq halqynyń 83,6%-y saqtandyrylǵan.
«Áleýmettik medıtsınalyq saqtandyrý qory» KeAQ Qyzylorda oblysy boıynsha fılıalynyń málimetinshe, 134,5 myńǵa jýyq adam mundaı mártebe almaǵan. Bul – oblys halqynyń 16,4%-y.
Memleket basshysynyń áleýmettik osal sanattarǵa jatatyn azamattar úshin medıtsınalyq saqtandyrýǵa aýdarymdardy jergilikti bıýdjet esebinen tóleý týraly tapsyrmasyna sáıkes saqtandyrý salasyndaǵy zań talaptaryna ózgerister engizildi. Endi jergilikti atqarýshy organdar áleýmettik ál-aýqat deńgeıi boıynsha daǵdarystyq jáne shuǵyl jaǵdaıdaǵy (D jáne E deńgeıi) sanattarǵa jatatyn azamattar úshin MÁMS jarnalaryn tóleıdi.
– Atalǵan shara Qyzylorda oblysynda saqtandyrylmaǵan azamattar sanyn azaıtýǵa yqpal etedi. Saqtandyrylmaǵan azamattardyń 4 823-i áleýmettik osal topqa jatady. Osy is- sharalar nátıjesinde kelesi jyly respýblıka boıynsha shamamen 1 mıllıon adam MÁMS júıesimen qosymsha qamtylmaq, - dedi fılıal dırektory Jaqsylyq Ábdýsámetov.
Taǵy bir jańalyq, resmı tirkelgen jumyssyzdar úshin de jarnalar jergilikti bıýdjet esebinen tólenedi.
– Bul halyqty jumyspen qamtý máseleleri boıynsha ákimdikterdiń jaýapkershiligin arttyrady. Óńirler jumys oryndaryn qurýǵa, kedeılikti azaıtýǵa jáne halyqty jumyspen qamtý boıynsha belsendi is-sharalar qabyldaýǵa yntaly bolady, - dedi fılıal basshysy.
Densaýlyq saqtaý mınıstrligi buǵan deıin MÁMS esebinen júrgiziletin eń kúrdeli ári qymbat on operatsııany atap ótti.