Qyzylorda oblysy ekonomıkalyq qylmystardan 2,8 mlrd teńge shyǵynǵa batty
QYZYLORDA. KAZINFORM — Ótken jyly Qyzylorda oblystyq ekonomıkalyq tergep-tekserý departamentiniń óndirisinde 61 is boldy. Onyń 48-i óndirispen aıaqtaldy, 37-si sotqa joldanyp, 11 is aqtalmaıtyn negizde toqtatyldy.
Departamenttiń baspasóz qyzmeti habarlaǵandaı, memleket odan 2 mlrd 817 mln teńge zııan shekken. Zalal somasynyń 1 mlrd 849 mln teńgesi nemese 39,6%-y óndirildi, quny 733 mln teńge múlikke tyıym salyndy.
— Respýblıkada birinshi ret jalpy salmaǵy 75,5 tonna, kedendik quny 254 mln teńge balyq ónimin Eýropalyq odaq elderine (Germanııa, Vengrııa) kontrabandalyq jolmen eksporttaý faktisi boıynsha aıyptaý úkimi shyǵaryldy. Úkim «SPK Qyzylorda Balyq» JShS quryltaıshysy men dırektoryna qatysty qabyldandy. Zańsyz krıpto aıyrbastaý jáne qylmystyq kiristi zańdastyrýǵa tosqaýyl qoıyldy. Zańsyz krıpto aıyrbastaý qyzmetin uıymdastyrý, tsıfrlyq aktıv aınalymy, sondaı-aq qylmystyq jolmen alynǵan kiristi zańdastyrý faktisi boıynsha qylmystyq is sotqa joldandy. Kúdiktilerge halyqaralyq qarjy ortalyǵynda tsıfrlyq aktıv salasynda qarjylyq qyzmet kórsetýge lıtsenzııasy bolmaǵanyna qaramastan «Binance» krıptobırja platformasy arqyly tsıfrlyq aktıvti satyp aldy jáne osy qyzmetpen aınalysty degen aıyp taǵyldy. Krıptoaktıv aınalymynyń kólemi — 1,88 mlrd teńge. Fıgýranttardyń biri kóp deńgeıli bank aýdarymy arqyly esirtkiniń zańsyz aınalymynan túsken aqshalaı qarajatty zańdastyrǵan. Qylmystyq jolmen alynǵan kiris retinde 5 avtokólik, 1 turǵyn úı, 1 páter men otbasylyq meıramhanaǵa — jalpy somasy 329,7 mln teńge múlikke tyıym salyndy, — delingen habarlamada.
Byltyr 6 qarjylyq pıramıdanyń joly kesildi, onyń ishinde 5 qylmystyq istiń óndirisi aıaqtaldy. Tergep-tekserý barysynda qylmystyq jolmen alynǵan kiristi zańdastyrý faktileri anyqtalyp, quny 301 mln teńge múlikti (Astana qalasyndaǵy sol jaǵalaýda, «EXPO» ǵımaraty mańynda ornalasqan 7 páter jáne 1 avtokólik) tárkileý týraly sot úkimi zańdy kúshine endi.
— Profılaktıkalyq jumys nátıjesinde «Kıberbaqylaý» júıesi arqyly 4 myńnan astam silteme buǵattaldy. Jarnamasy myqty, usynysy kóz qyzyqtyryp, adamdardy joldan taıdyratyn salanyń biri — zańsyz qumar oıyndar. Ótken jyly zańsyz oıyn bıznesin uıymdastyrýdyń 5 deregi anyqtalyp, ister sotqa joldandy. 1 derek boıynsha qylmystyq jolmen alynǵan kiristiń zańdastyrylǵany anyqtaldy, — delingen departament habarlamasynda.
Buǵan deıin Qarjy monıtorıngi agenttiginiń Almaty qalasy boıynsha departamenti zańsyz ınvestıtsııalyq qyzmet salasyndaǵy alaıaqtyq faktisi boıynsha tergeý júrgizip jatqanyn jazǵanbyz.